wada us mah-ru ke aane ka

vaada us māh-rū ke aane kā

ye nasība siyāh-ḳhāne kā

kah rahī hai nigāh-e-duz-dīda

ruḳh badalne ko hai zamāne kā

zarre zarre meñ be-hijāb haiñ vo

jin ko daavā hai muñh chhupāne kā

hāsil-e-umr hai shabāb magar

ik yahī vaqt hai gañvāne kā

chāndnī ḳhāmushī aur āḳhir shab

aa ki hai vaqt dil lagāne kā

hai qayāmat tire shabāb kā rañg

rañg badlegā phir zamāne kā

terī āñkhoñ kī ho na ho taqsīr

naam rusvā sharāb-ḳhāne kā

rah ga.e ban ke ham sarāpā ġham

ye natīja hai dil lagāne kā

jis kā har lafz hai sarāpā ġham

maiñ huuñ unvān us fasāne kā

us kī badlī huī nazar tauba

yuuñ badaltā hai ruḳh zamāne kā

dekhte haiñ hameñ vo chhup chhup kar

parda rah jaa.e muñh chhupāne kā

kar diyā ḳhūgar-e-sitam 'aḳhtar'

ham pe ehsān hai zamāne kā

wada us mah-ru ke aane ka

ye nasiba siyah-KHane ka

kah rahi hai nigah-e-duz-dida

ruKH badalne ko hai zamane ka

zarre zarre mein be-hijab hain wo

jin ko dawa hai munh chhupane ka

hasil-e-umr hai shabab magar

ek yahi waqt hai ganwane ka

chandni KHamushi aur aaKHir shab

aa ki hai waqt dil lagane ka

hai qayamat tere shabab ka rang

rang badlega phir zamane ka

teri aankhon ki ho na ho taqsir

nam ruswa sharab-KHane ka

rah gae ban ke hum sarapa gham

ye natija hai dil lagane ka

jis ka har lafz hai sarapa gham

main hun unwan us fasane ka

us ki badli hui nazar tauba

yun badalta hai ruKH zamane ka

dekhte hain hamein wo chhup chhup kar

parda rah jae munh chhupane ka

kar diya KHugar-e-sitam 'aKHtar'

hum pe ehsan hai zamane ka