wah kis rang pe hai rang-e-bahaar-e-ariz

vaah kis rang pe hai rang-e-bahār-e-āriz

bāġh-e-firdaus kā har phuul nisār-e-āriz

lailatul-qadr hai ai maah tirā ḳhatt-e-siyāh

sub.h yaum-ul-'arafa nūr-e-dayār-e-āriz

sahar-e-īd kā ā.īna savād is kā hai

hai chamaktī huī iqlīm dayār-e-āriz

hai nazar ḳhīra ye hai ḳhatt-e-siyah kā jalva

din se baḌh kar hai faroġh-e-shab-e-tār-e-āriz

ho chalā bārvar ab naḳhl-e-javānī un kā

chashm-e-bad duur hai āġhāz-e-bahār-e-āriz

mahr se baḌh ke hai zarre kī chamak us ruḳh par

falak-ul-'arsh hai yā hai ye ġhubār-e-āriz

hūreñ mashshāta haiñ har haft kī ḳhidmat hai unheñ

maah ā.īna hai mehr ā.īna-dār-e-āriz

nūr-e-ruḳh sabzī-e-ḳhat pesh-e-nazar haiñ donoñ

merī āñkhoñ meñ hai ye lail-o-nahār-e-āriz

ai gul-andām tire husn kī rangat hai kuchh aur

phuul bhī sadqe haiñ bulbul bhī nisār-e-āriz

aa.ina sāmne hai mahv-e-tamāshā haiñ vo

dekhte haiñ mirī āñkhoñ se bahār-e-āriz

zulfeñ ruḳh par tire bal kartī haiñ zebā hai unheñ

un kī jāgīr meñ likkhā hai dayār-e-āriz

rang halkā sā gulābī hai phir us par ḳhat-e-sabz

qābil-e-dīd hai 'akbar' ye bahār-e-āriz

wah kis rang pe hai rang-e-bahaar-e-ariz

bagh-e-firdaus ka har phul nisar-e-ariz

lailatul-qadr hai ai mah tera KHatt-e-siyah

subh yaum-ul-'arafa nur-e-dayar-e-ariz

sahar-e-id ka aaina sawad is ka hai

hai chamakti hui iqlim dayar-e-ariz

hai nazar KHira ye hai KHatt-e-siyah ka jalwa

din se baDh kar hai farogh-e-shab-e-tar-e-ariz

ho chala barwar ab naKHl-e-jawani un ka

chashm-e-bad dur hai aaghaz-e-bahaar-e-ariz

mahr se baDh ke hai zarre ki chamak us ruKH par

falak-ul-'arsh hai ya hai ye ghubar-e-ariz

huren mashshata hain har haft ki KHidmat hai unhen

mah aaina hai mehr aaina-dar-e-ariz

nur-e-ruKH sabzi-e-KHat pesh-e-nazar hain donon

meri aankhon mein hai ye lail-o-nahaar-e-ariz

ai gul-andam tere husn ki rangat hai kuchh aur

phul bhi sadqe hain bulbul bhi nisar-e-ariz

aaina samne hai mahw-e-tamasha hain wo

dekhte hain meri aankhon se bahaar-e-ariz

zulfen ruKH par tere bal karti hain zeba hai unhen

un ki jagir mein likkha hai dayar-e-ariz

rang halka sa gulabi hai phir us par KHat-e-sabz

qabil-e-did hai 'akbar' ye bahaar-e-ariz