wah ye lutf-e-soz-e-ulfat kis ki badaulat dil ki badaulat

vaah ye lutf-e-soz-e-ulfat kis kī badaulat dil kī badaulat

dozaḳh bhī hai mujh ko jannat kis kī badaulat dil kī badaulat

dil meñ hai dāġhoñ kī kasrat kis kī badaulat dil kī badaulat

aisī daulat itnī daulat kis kī badaulat dil kī badaulat

sab se ulfat sab kī hasrat kis kī badaulat dil kī badaulat

Dāvāñ-Dol hai merī niyyat kis kī badaulat dil kī badaulat

pesh-e-nazar rahte haiñ bāham phirte haiñ ā.ankhoñ meñ har dam

husn-e-kasrat nūr-e-vahdat kis kī badaulat dil kī badaulat

un ko bhī hai merā saudā aur mujhe bhī saudā un kā

ek huī donoñ kī sūrat kis kī badaulat dil kī badaulat

dekh liyā kartā huuñ aksar ye bhī aalam vo bhī manzar

shām-e-furqat sub.h-e-qayāmat kis kī badaulat dil kī badaulat

kartā huuñ maiñ apnā mātam aatī hai ulfat meñ paiham

kis par aafat mujh par aafat kis kī badaulat dil kī badaulat

maiñ jo na bazm-e-nāz meñ jaatā kyuuñ ġhamza mujh ko taḌpātā

hañste bolte aa ga.ī shāmat kis kī badaulat dil kī badaulat

ahl-e-vafā ne mujh ko jaanā ahl-e-jafā ne bhī pahchānā

ye hai izzat ye hai shohrat kis kī badaulat dil kī badaulat

kyā ho qasd nikal jaane kā ghar pā kar ab shaad hai kyā kyā

armāñ armāñ hasrat hasrat kis kī badaulat dil kī badaulat

aksar miTnā aksar ubharnā aksar jiinā aksar marnā

rahtī hai ye merī sūrat kis kī badaulat dil kī badaulat

uThte baiThte ronā dhonā ashkoñ se duniyā ko Dubonā

'nūh' ye hai tūfān kī shiddat kis kī badaulat dil kī badaulat

wah ye lutf-e-soz-e-ulfat kis ki badaulat dil ki badaulat

dozaKH bhi hai mujh ko jannat kis ki badaulat dil ki badaulat

dil mein hai daghon ki kasrat kis ki badaulat dil ki badaulat

aisi daulat itni daulat kis ki badaulat dil ki badaulat

sab se ulfat sab ki hasrat kis ki badaulat dil ki badaulat

Dawan-Dol hai meri niyyat kis ki badaulat dil ki badaulat

pesh-e-nazar rahte hain baham phirte hain aaankhon mein har dam

husn-e-kasrat nur-e-wahdat kis ki badaulat dil ki badaulat

un ko bhi hai mera sauda aur mujhe bhi sauda un ka

ek hui donon ki surat kis ki badaulat dil ki badaulat

dekh liya karta hun aksar ye bhi aalam wo bhi manzar

sham-e-furqat subh-e-qayamat kis ki badaulat dil ki badaulat

karta hun main apna matam aati hai ulfat mein paiham

kis par aafat mujh par aafat kis ki badaulat dil ki badaulat

main jo na bazm-e-naz mein jata kyun ghamza mujh ko taDpata

hanste bolte aa gai shamat kis ki badaulat dil ki badaulat

ahl-e-wafa ne mujh ko jaana ahl-e-jafa ne bhi pahchana

ye hai izzat ye hai shohrat kis ki badaulat dil ki badaulat

kya ho qasd nikal jaane ka ghar pa kar ab shad hai kya kya

arman arman hasrat hasrat kis ki badaulat dil ki badaulat

aksar miTna aksar ubharna aksar jina aksar marna

rahti hai ye meri surat kis ki badaulat dil ki badaulat

uThte baiThte rona dhona ashkon se duniya ko Dubona

'nuh' ye hai tufan ki shiddat kis ki badaulat dil ki badaulat