wahid parast ishq-ba-daman bana diya

vāhid parast ishq-ba-dāmāñ banā diyā

kāfir nazar ne ham ko musalmāñ banā diyā

ġhunche ko gul to gul ko gulistāñ banā diyā

zarre ko tū ne mehr-e-daraḳhshāñ banā diyā

ham the faqat farishta hī banñe pe mutma.in

ye hai ḳhudā kī den ki insāñ banā diyā

dil de ke dil ko lazzat-e-ġham de zahe nasīb

ḳhud dard hī ko dard kā darmāñ banā diyā

allāh junūn-e-ishq kī mojiz-numā.iyāñ

īmāñ ko kufr kufr ko īmāñ banā diyā

kis ne sameT kar ġham-e-kaunain ko 'sahar'

dil ko rahīn-e-sozish-e-pinhāñ banā diyā

wahid parast ishq-ba-daman bana diya

kafir nazar ne hum ko musalman bana diya

ghunche ko gul to gul ko gulistan bana diya

zarre ko tu ne mehr-e-daraKHshan bana diya

hum the faqat farishta hi banne pe mutmain

ye hai KHuda ki den ki insan bana diya

dil de ke dil ko lazzat-e-gham de zahe nasib

KHud dard hi ko dard ka darman bana diya

allah junun-e-ishq ki mojiz-numaiyan

iman ko kufr kufr ko iman bana diya

kis ne sameT kar gham-e-kaunain ko 'sahar'

dil ko rahin-e-sozish-e-pinhan bana diya