waiz buton ke aage na furqan nikaliye

vaa.iz butoñ ke aage na furqāñ nikāliye

sūrat se un kī ma.anī-e-qur.āñ nikāliye

hai dil meñ mudda.ā ki evaz jaañ nikāliye

jī khoiye pa jī kā na armāñ nikāliye

is dil meñ aise tiir haiñ kitne hī be-nishāñ

āp-apnā dekh-bhāl ke paikāñ nikāliye

hai jī meñ rakhiye aah ke sho.ala pe laḳht-e-dil

pariyoñ ke sar pe taḳht-e-sulaimāñ nikāliye

zaḳhm aur aa.e lek mirī jaañ ḳhalish na jaa.e

dil chīriye jigar se na paikāñ nikāliye

dikhlā.iye na kāvish-e-paikāñ kā intizār

nashtar se jald dīda-e-hairāñ nikāliye

rahiye 'mazāq' hashr ke maidāñ meñ surḳh-rū

mazmūn-e-rū-e-shāh-e-shahīdāñ nikāliye

waiz buton ke aage na furqan nikaliye

surat se un ki mani-e-quran nikaliye

hai dil mein muddaa ki ewaz jaan nikaliye

ji khoiye pa ji ka na arman nikaliye

is dil mein aise tir hain kitne hi be-nishan

aap-apna dekh-bhaal ke paikan nikaliye

hai ji mein rakhiye aah ke shoala pe laKHt-e-dil

pariyon ke sar pe taKHt-e-sulaiman nikaliye

zaKHm aur aae lek meri jaan KHalish na jae

dil chiriye jigar se na paikan nikaliye

dikhlaiye na kawish-e-paikan ka intizar

nashtar se jald dida-e-hairan nikaliye

rahiye 'mazaq' hashr ke maidan mein surKH-ru

mazmun-e-ru-e-shah-e-shahidan nikaliye