wan agar jaen to le kar jaen kya

vaañ agar jaa.eñ to le kar jaa.eñ kyā

muñh use ham jā ke ye dikhlā.eñ kyā

dil meñ hai baaqī vahī hirs-e-gunāh

phir kiye se apne ham pachhtā.eñ kyā

aao leñ us ko hamīñ jā kar manā

us kī be-parvā.iyoñ par jaa.eñ kyā

dil ko masjid se na mandir se hai uns

aise vahshī ko kahīñ bahlā.eñ kyā

jāntā duniyā ko hai ik khel tū

khel qudrat ke tujhe dikhlā.eñ kyā

umr kī manzil to juuñ tuuñ kaT ga.ī

marhale ab dekhiye pesh aa.eñ kyā

dil ko sab bātoñ kī hai nāseh ḳhabar

samjhe samjhā.e ko bas samjhā.eñ kyā

maan liije shaiḳh jo da.avā kare

ik buzurg-e-dīñ ko ham jhuTlā.eñ kyā

ho chuke 'hālī' ġhazal-ḳhvānī ke din

rāgnī be-vaqt kī ab gaa.eñ kyā

wan agar jaen to le kar jaen kya

munh use hum ja ke ye dikhlaen kya

dil mein hai baqi wahi hirs-e-gunah

phir kiye se apne hum pachhtaen kya

aao len us ko hamin ja kar mana

us ki be-parwaiyon par jaen kya

dil ko masjid se na mandir se hai uns

aise wahshi ko kahin bahlaen kya

jaanta duniya ko hai ek khel tu

khel qudrat ke tujhe dikhlaen kya

umr ki manzil to jun tun kaT gai

marhale ab dekhiye pesh aaen kya

dil ko sab baaton ki hai naseh KHabar

samjhe samjhae ko bas samjhaen kya

man lije shaiKH jo dawa kare

ek buzurg-e-din ko hum jhuTlaen kya

ho chuke 'haali' ghazal-KHwani ke din

ragni be-waqt ki ab gaen kya