wafa ki aag mein pahle pighal ke dekho to

vafā kī aag meñ pahle pighal ke dekho to

hai ishq kyā ye samajh loge jal ke dekho to

vo sang-e-rāh nahīñ koh-e-nūr hiirā hai

nazar ke zāviye apnī badal ke dekho to

sukūn-e-dil kā ḳhazāna zarūr pāoge

havas ke naag ko pahle kuchal ke dekho to

har ek aañkh kā aañsū tumhārā apnā hai

hisār-e-zāt se bāhar nikal ke dekho to

tavangaroñ kī ziyāfat ko jaan jāoge

zarā ye qīmtī kapḌe badal ke dekho to

hai haq kā rāsta kyā ḳhud-baḳhud samajh loge

dahaktī aag pe do gaam chal ke dekho to

ḳhud apnī asl haqīqat ko jaan loge 'vafā'

tum ā.īne ko kabhī aañkh mal ke dekho to

wafa ki aag mein pahle pighal ke dekho to

hai ishq kya ye samajh loge jal ke dekho to

wo sang-e-rah nahin koh-e-nur hira hai

nazar ke zawiye apni badal ke dekho to

sukun-e-dil ka KHazana zarur paoge

hawas ke nag ko pahle kuchal ke dekho to

har ek aankh ka aansu tumhaara apna hai

hisar-e-zat se bahar nikal ke dekho to

tawangaron ki ziyafat ko jaan jaoge

zara ye qimti kapDe badal ke dekho to

hai haq ka rasta kya KHud-baKHud samajh loge

dahakti aag pe do gam chal ke dekho to

KHud apni asl haqiqat ko jaan loge 'wafa'

tum aaine ko kabhi aankh mal ke dekho to