wafa ki aas mein dil de ke pachhtaya nahin karte

vafā kī aas meñ dil de ke pachhtāyā nahīñ karte

ye naḳhl-e-ārzū hai is meñ phal aayā nahīñ karte

ḳhayāloñ meñ jab aate haiñ to pahroñ jā nahīñ paate

ham ab be-vasl tanhā.ī bhī ghabrāyā nahīñ karte

hamārī niiñd se kyā vāsta hai un kī nīñdoñ ko

sunā hai vo bhī ab ārām farmāyā nahīñ karte

zarā se kyā payām aatā hai dushman jal ke marte haiñ

ḳhudā kā shukr hai vo ḳhud idhar aayā nahīñ karte

na tum aao na niiñd aa.e na hī kam-baḳht maut aa.e

ye kaisī kashmakash hai yuuñ bhī taḌpāyā nahīñ karte

hamārī tishnagī-e-dīd ik din rañg lā.egī

shahīdoñ kī qasam pyāsoñ ko tarsāyā nahīñ karte

hamāre gird jo phirte the ḳhush-hālī ke aalam meñ

shikāyat kyā ki 'tāj' ab bhuul kar aayā nahīñ karte

wafa ki aas mein dil de ke pachhtaya nahin karte

ye naKHl-e-arzu hai is mein phal aaya nahin karte

KHayalon mein jab aate hain to pahron ja nahin pate

hum ab be-wasl tanhai bhi ghabraya nahin karte

hamari nind se kya wasta hai un ki nindon ko

suna hai wo bhi ab aaram farmaya nahin karte

zara se kya payam aata hai dushman jal ke marte hain

KHuda ka shukr hai wo KHud idhar aaya nahin karte

na tum aao na nind aae na hi kam-baKHt maut aae

ye kaisi kashmakash hai yun bhi taDpaya nahin karte

hamari tishnagi-e-did ek din rang laegi

shahidon ki qasam pyason ko tarsaya nahin karte

hamare gird jo phirte the KHush-haali ke aalam mein

shikayat kya ki 'taj' ab bhul kar aaya nahin karte