wafa ki rah mein har marhala aasan nahin hota

vafā kī raah meñ har marhala āsāñ nahīñ hotā

kisī ko bhuul jaanā dard kā darmāñ nahīñ hotā

pazīrā.ī kahāñ hotī hai ab shā.ista jazboñ kī

har aisā hādsa minnat-kash-e-ehsāñ nahīñ hotā

Thikāna ek hī rahtā hai kab āzād bandoñ kā

kabhī bhī sarfaroshoñ kā makāñ zindāñ nahīñ hotā

chhupā hai is tarah vo apne hī jalvoñ ke parde meñ

ruḳh-e-pur-nūr uryāñ ho ke bhī uryāñ nahīñ hotā

vo apnā ghar basā legā zarā mohlat use denā

koī bhī be-sahārā mustaqil mehmāñ nahīñ hotā

ye maanā hādsa hai zindagī se pyaar karnā bhī

tumhārī tarah se kyoñ dil mirā shādāñ nahīñ hotā

salīqa aap ne sikhlāyā us ko jiine marne kā

'munīr' apnī tabī.at par kabhī nāzāñ nahīñ hotā

wafa ki rah mein har marhala aasan nahin hota

kisi ko bhul jaana dard ka darman nahin hota

pazirai kahan hoti hai ab shaista jazbon ki

har aisa hadsa minnat-kash-e-ehsan nahin hota

Thikana ek hi rahta hai kab aazad bandon ka

kabhi bhi sarfaroshon ka makan zindan nahin hota

chhupa hai is tarah wo apne hi jalwon ke parde mein

ruKH-e-pur-nur uryan ho ke bhi uryan nahin hota

wo apna ghar basa lega zara mohlat use dena

koi bhi be-sahaara mustaqil mehman nahin hota

ye mana hadsa hai zindagi se pyar karna bhi

tumhaari tarah se kyon dil mera shadan nahin hota

saliqa aap ne sikhlaya us ko jine marne ka

'munir' apni tabiat par kabhi nazan nahin hota