wafa ne jhum ke jab tere git gae hain

vafā ne jhuum ke jab tere giit gaa.e haiñ

qadam ufuq pe andheroñ ke laḌkhaḌā.e haiñ

tire qarīb pahuñch kar bhī kam nahīñ hote

ġham-e-hayāt ne jo fāsle baḌhā.e haiñ

bahut tavīl sahī rāh-e-justujū lekin

bahut hasīn tire gesuoñ ke saa.e haiñ

tirī nigāh mudāvā na ban sakī jin kā

tirī talāsh meñ aise bhī zaḳhm khaa.e haiñ

paḌā hai 'aks jo ruḳhsār-e-shola-e-mai kā

to ā.īne tirī yādoñ ke jagmagā.e haiñ

musāfirān-e-shab-e-ġham kī raah meñ 'jāmī'

na.e charāġh mirī fikr ne jalā.e haiñ

wafa ne jhum ke jab tere git gae hain

qadam ufuq pe andheron ke laDkhaDae hain

tere qarib pahunch kar bhi kam nahin hote

gham-e-hayat ne jo fasle baDhae hain

bahut tawil sahi rah-e-justuju lekin

bahut hasin tere gesuon ke sae hain

teri nigah mudawa na ban saki jin ka

teri talash mein aise bhi zaKHm khae hain

paDa hai 'aks jo ruKHsar-e-shola-e-mai ka

to aaine teri yaadon ke jagmagae hain

musafiran-e-shab-e-gham ki rah mein 'jami'

nae charagh meri fikr ne jalae hain