wafa-parast jahan-e-wafa ko le Dube

vafā-parast jahān-e-vafā ko le Duube

ajiib baat hai bande ḳhudā ko le Duube

ye kaalī kaalī ghaTā jo barasne vaalī hai

maza to jab hai kisī pārsā ko le Duube

safīne ye to nahīñ haiñ jo haiñ kināroñ par

safīne vo the jo mauj-e-balā ko le Duube

tamām ahl-e-nazāra kī laaj rakh legī

vo ik nazar jo kisī kī adā ko le Duube

ye kaise kaise riyā-kār haiñ zamāne meñ

sazā ke naam se chauñke jazā ko le Duube

bajā hai shān-e-karīmī ye sab ġhurūr magar

yahī ġhurūr to ahl-e-ḳhatā ko le Duube

hamesha yaad hamīñ tak rahe hamāre ġham

vo dost kyā jo kisī ham-navā ko le Duube

wafa-parast jahan-e-wafa ko le Dube

ajib baat hai bande KHuda ko le Dube

ye kali kali ghaTa jo barasne wali hai

maza to jab hai kisi parsa ko le Dube

safine ye to nahin hain jo hain kinaron par

safine wo the jo mauj-e-bala ko le Dube

tamam ahl-e-nazara ki laj rakh legi

wo ek nazar jo kisi ki ada ko le Dube

ye kaise kaise riya-kar hain zamane mein

saza ke nam se chaunke jaza ko le Dube

baja hai shan-e-karimi ye sab ghurur magar

yahi ghurur to ahl-e-KHata ko le Dube

hamesha yaad hamin tak rahe hamare gham

wo dost kya jo kisi ham-nawa ko le Dube