wafaen kar ke jafaon ka gham uThae ja

vafā.eñ kar ke jafāoñ kā ġham uThā.e jā

isī tarah se zamāne ko āzmā.e jā

kisī meñ apnī sifat ke sivā kamāl nahīñ

jidhar ishāra-e-fitrat ho sar jhukā.e jā

vo lau rabāb se niklī dhuāñ uThā dil se

vafā kā raag isī dhun meñ gungunā.e jā

nazar ke saath mohabbat badal nahīñ saktī

nazar badal ke mohabbat ko āzmā.e jā

ḳhudi-e-ishq ne jis din se khol diiñ āñkheñ

hai āñsuoñ kā taqāzā ki muskurā.e jā

nahīñ hai ġham to mohabbat kī tarbiyat nāqis

havādis aa.eñ to narmī se pesh aa.e jā

thī ibtidā meñ ye tādīb-e-muflisī mujh ko

ġhulām rah ke ġhulāmī pe muskurā.e jā

badal na raah ḳhirad ke fareb meñ aa kar

junūñ ke naqsh-e-qadam par qadam baḌhā.e jā

ummīd o yaas meñ jiinā hai ishq kā maqsūd

isī maqām-e-muqaddas pe tilmilā.e jā

chaman meñ fursat o taskīñ hai maut kā paiġhām

sukūñ pasand na kar āshiyāñ banā.e jā

yahī hai lutf-e-mohabbat yahī hai kaif-e-hayāt

haqīqatoñ kī binā par fareb khaa.e jā

vafā kā ḳhvāb hai 'ehsān' ḳhvāb-e-be-tābīr

vafā.eñ kar ke muqaddar ko āzmā.e jā

wafaen kar ke jafaon ka gham uThae ja

isi tarah se zamane ko aazmae ja

kisi mein apni sifat ke siwa kamal nahin

jidhar ishaara-e-fitrat ho sar jhukae ja

wo lau rabab se nikli dhuan uTha dil se

wafa ka rag isi dhun mein gungunae ja

nazar ke sath mohabbat badal nahin sakti

nazar badal ke mohabbat ko aazmae ja

KHudi-e-ishq ne jis din se khol din aankhen

hai aansuon ka taqaza ki muskurae ja

nahin hai gham to mohabbat ki tarbiyat naqis

hawadis aaen to narmi se pesh aae ja

thi ibtida mein ye tadib-e-muflisi mujh ko

ghulam rah ke ghulami pe muskurae ja

badal na rah KHirad ke fareb mein aa kar

junun ke naqsh-e-qadam par qadam baDhae ja

ummid o yas mein jina hai ishq ka maqsud

isi maqam-e-muqaddas pe tilmilae ja

chaman mein fursat o taskin hai maut ka paigham

sukun pasand na kar aashiyan banae ja

yahi hai lutf-e-mohabbat yahi hai kaif-e-hayat

haqiqaton ki bina par fareb khae ja

wafa ka KHwab hai 'ehsan' KHwab-e-be-tabir

wafaen kar ke muqaddar ko aazmae ja