wahi andaz purane nahin jiddat koi

vahī andāz purāne nahīñ jiddat koī

nayā lahja nahīñ ab zer-e-samā.at koī

lai na.ī aur nayā āhang uThā naġhma-tarāz

jaag uThe ḳhufta lahū meñ na.ī hiddat koī

jhuuT par laakh mulamma.a ho sadāqat malfūf

khul hī jaatī hai nahīñ chhuptī haqīqat koī

kis liye ḳhaar hai khoī huī ġhairat ko jagā

giḌgiḌāne se nahīñ miltī hai 'izzat koī

laakh kar va.ada-ḳhilāfī-o-taġhāful ai dost

dil se kam honī nahīñ terī mohabbat koī

mujh ko baḳhshā hai mire rab ne ye ejāz-e-suḳhan

maiñ ne bātil kī nahīñ karnī himāyat koī

rustagārī hai kise ranj-o-alam se 'mīnā'

arsa-e-jehd hai yaaro nahīñ jannat koī

wahi andaz purane nahin jiddat koi

naya lahja nahin ab zer-e-samaat koi

lai nai aur naya aahang uTha naghma-taraaz

jag uThe KHufta lahu mein nai hiddat koi

jhuT par lakh mulamma ho sadaqat malfuf

khul hi jati hai nahin chhupti haqiqat koi

kis liye KHar hai khoi hui ghairat ko jaga

giDgiDane se nahin milti hai 'izzat koi

lakh kar wada-KHilafi-o-taghaful ai dost

dil se kam honi nahin teri mohabbat koi

mujh ko baKHsha hai mere rab ne ye ejaz-e-suKHan

main ne baatil ki nahin karni himayat koi

rustagari hai kise ranj-o-alam se 'mina'

arsa-e-jehd hai yaro nahin jannat koi