wahi be-libas kyariyan kahin bel buTon ke bal nahin

vahī be-libās kyāriyāñ kahīñ bel būToñ ke bal nahīñ

tujhe kyā bulā.ūñ maiñ baaġh meñ kisī peḌ par koī phal nahīñ

hue ḳhushk bahr to kyā huā mirī naav zor-e-havā pe hai

mire bādbāñ haiñ bhare hue so balā se ret meñ jal nahīñ

hai dabāv ashra havās par haiñ tamām uzv khiñche rabar

huuñ uthal-puthal se ghirā magar mujhe izn-e-radd-e-amal nahīñ

kisī be-ġhurūb nigāh se kisī lā-zavāl shuā meñ

sabhī zāviyoñ se alag-thalag mujhe hal karo mirā hal nahīñ

tirī niiñd se baḌī aañkh meñ mujhe tābkār kare kiran

mujhe aisī dhaat kā qalb de jise ḳhauf-e-radd-o-badal nahīñ

kahīñ pāniyoñ meñ bichhī na ho kabhī sāhiloñ sī khulī na ho

vo zamīñ de mere jahāz ko jahāñ dūsre kī pahal nahīñ

sabhī sard-o-garm ibārateñ mire ḳhāl-o-ḳhad kā haiñ zāhirā

jise taḳhliye kī amiiñ kahūñ vo sunāne vaalī ġhazal nahīñ

wahi be-libas kyariyan kahin bel buTon ke bal nahin

tujhe kya bulaun main bagh mein kisi peD par koi phal nahin

hue KHushk bahr to kya hua meri naw zor-e-hawa pe hai

mere baadban hain bhare hue so bala se ret mein jal nahin

hai dabaw ashra hawas par hain tamam uzw khinche rabar

hun uthal-puthal se ghira magar mujhe izn-e-radd-e-amal nahin

kisi be-ghurub nigah se kisi la-zawal shua mein

sabhi zawiyon se alag-thalag mujhe hal karo mera hal nahin

teri nind se baDi aankh mein mujhe tabkar kare kiran

mujhe aisi dhat ka qalb de jise KHauf-e-radd-o-badal nahin

kahin paniyon mein bichhi na ho kabhi sahilon si khuli na ho

wo zamin de mere jahaz ko jahan dusre ki pahal nahin

sabhi sard-o-garm ibaraten mere KHal-o-KHad ka hain zahira

jise taKHliye ki amin kahun wo sunane wali ghazal nahin