wahi daricha-e-jaan hai wahi gali yaro

vahī darīcha-e-jāñ hai vahī galī yaaro

magar nigāh irāda badal chukī yaaro

kitāb-e-hāl kā koī varaq nahīñ palTā

kitāb-e-ahd-e-guzishta bhī kab paḌhī yaaro

ham apne zehn kī almāriyoñ meñ DhūñDeñge

vo ek saal vo ik maah vo ghaḌī yaaro

is ek moḌ pe tanhā hamīñ akele haiñ

ki pichhle moḌ pe duniyā bhī saath thī yaaro

ḳhudā kā shukr ki sab ḳhairiyat se hai yā'nī

mire vajūd meñ halchal hai aaj bhī yaaro

ye aur baat ki un ko yaqīñ nahīñ aayā

pa koī baat to barsoñ meñ ham ne kī yaaro

wahi daricha-e-jaan hai wahi gali yaro

magar nigah irada badal chuki yaro

kitab-e-haal ka koi waraq nahin palTa

kitab-e-ahd-e-guzishta bhi kab paDhi yaro

hum apne zehn ki almariyon mein DhunDenge

wo ek sal wo ek mah wo ghaDi yaro

is ek moD pe tanha hamin akele hain

ki pichhle moD pe duniya bhi sath thi yaro

KHuda ka shukr ki sab KHairiyat se hai ya'ni

mere wajud mein halchal hai aaj bhi yaro

ye aur baat ki un ko yaqin nahin aaya

pa koi baat to barson mein hum ne ki yaro