wahi hai rang-e-tabiat wahi KHisal mere

vahī hai rang-e-tabī.at vahī ḳhisāl mire

taġhayyuroñ ke nishāñ haiñ safed baal mire

qadam qadam pe luTā.ī hai kā.enāt-e-hayāt

dayār-o-dasht meñ bikhre haiñ māh-o-sāl mire

milūñ na maiñ to mirā gulshan-e-nasab dekheñ

mirī shabīh kā partav haiñ naunihāl mire

na.ī fazā kā taqāzā ki maiñ panap na sakūñ

akaas bel se rut ne bune haiñ jaal mire

inhīñ ke naam se pahchān hai mire fan kī

mirā vaqār haiñ yārān-e-bā-kamāl mire

milā bhī izn-e-takallum to kuchh kahā na gayā

sukūt-e-lab meñ muqaffal rahe savāl mire

maiñ ik musāfir-e-mauj-e-sarāb huuñ 'rāsiḳh'

kiye haiñ masḳh bagūloñ ne ḳhadd-o-ḳhāl mire

wahi hai rang-e-tabiat wahi KHisal mere

taghayyuron ke nishan hain safed baal mere

qadam qadam pe luTai hai kaenat-e-hayat

dayar-o-dasht mein bikhre hain mah-o-sal mere

milun na main to mera gulshan-e-nasab dekhen

meri shabih ka partaw hain naunihaal mere

nai faza ka taqaza ki main panap na sakun

akas bel se rut ne bune hain jal mere

inhin ke nam se pahchan hai mere fan ki

mera waqar hain yaran-e-ba-kamal mere

mila bhi izn-e-takallum to kuchh kaha na gaya

sukut-e-lab mein muqaffal rahe sawal mere

main ek musafir-e-mauj-e-sarab hun 'rasiKH'

kiye hain masKH bagulon ne KHadd-o-KHal mere