wahi hum hain wahi lachaariyan hain

vahī ham haiñ vahī lāchāriyāñ haiñ

vahī yāroñ kī duniyā-dāriyāñ haiñ

vo sūkhī aañkh se ronā bilaknā

azā-dārī meñ bhī fan-kāriyāñ haiñ

kahāñ tak tum 'ilāj is kā karoge

ki is dil ko ka.ī bīmāriyāñ haiñ

nasīb apnā likhā hai āsmāñ par

zamīñ par sirf zimmedāriyāñ haiñ

sabā sargoshiyoñ meñ kah rahī hai

yahāñ se kuuch kī tayyāriyāñ haiñ

nahīñ kuchh farq gul-rut ho yā patjhaḌ

tabī'at kī judā gulkāriyāñ haiñ

jigar patthar kā rakhtā hai suḳhanvar

chaTānoñ sī yahāñ tah-dāriyāñ haiñ

matā-e-ġham chhupā.eñ kyoñ na 'afsar'

sharīfoñ kī yahī zar-dāriyāñ haiñ

wahi hum hain wahi lachaariyan hain

wahi yaron ki duniya-dariyan hain

wo sukhi aankh se rona bilakna

aza-dari mein bhi fan-kariyan hain

kahan tak tum 'ilaj is ka karoge

ki is dil ko kai bimariyan hain

nasib apna likha hai aasman par

zamin par sirf zimmedariyan hain

saba sargoshiyon mein kah rahi hai

yahan se kuch ki tayyariyan hain

nahin kuchh farq gul-rut ho ya patjhaD

tabi'at ki juda gulkariyan hain

jigar patthar ka rakhta hai suKHanwar

chaTanon si yahan tah-dariyan hain

mata-e-gham chhupaen kyon na 'afsar'

sharifon ki yahi zar-dariyan hain