wahi husn-e-yar mein hai wahi lala-zar mein hai

vahī husn-e-yār meñ hai vahī lāla-zār meñ hai

vo jo kaifiyat nashe kī mai-e-ḳhush-gavār meñ hai

ye chaman kī aarzū hai koī luuT le chaman ko

ye tamām rañg-o-nik.hat tire iḳhtiyār meñ hai

tire haath kī bulandī meñ faroġh-e-kahkashāñ hai

ye hujūm-e-māh-o-anjum tire intizār meñ hai

bas usī ko toḌnā hai ye junūn-e-naf.a-ḳhorī

yahī ek sard ḳhanjar dil-e-rozgār meñ hai

abhī zindagī hasīñ hai abhī zikr-e-maut kaisā

abhī phuul khil rahe haiñ abhī to kanār meñ hai

abhī mai-kada javāñ hai abhī mauj meñ hai saaqī

abhī jaam raqs meñ hai abhī mai bahār meñ hai

yahī merā sher-o-naġhma yahī merī fikr-o-hikmat

jo surū-o-dard-mandī dil-e-be-qarār meñ hai

wahi husn-e-yar mein hai wahi lala-zar mein hai

wo jo kaifiyat nashe ki mai-e-KHush-gawar mein hai

ye chaman ki aarzu hai koi luT le chaman ko

ye tamam rang-o-nikhat tere iKHtiyar mein hai

tere hath ki bulandi mein farogh-e-kahkashan hai

ye hujum-e-mah-o-anjum tere intizar mein hai

bas usi ko toDna hai ye junun-e-nafa-KHori

yahi ek sard KHanjar dil-e-rozgar mein hai

abhi zindagi hasin hai abhi zikr-e-maut kaisa

abhi phul khil rahe hain abhi to kanar mein hai

abhi mai-kada jawan hai abhi mauj mein hai saqi

abhi jam raqs mein hai abhi mai bahaar mein hai

yahi mera sher-o-naghma yahi meri fikr-o-hikmat

jo suru-o-dard-mandi dil-e-be-qarar mein hai