wahi mere KHas-o-KHashak se nikalta hai

vahī mire ḳhas-o-ḳhāshāk se nikaltā hai

jo rañg sā tirī poshāk se nikaltā hai

karegā kyuuñ na mire baad hasratoñ kā shumār

tirā bhī hissa in imlāk se nikaltā hai

havā ke saath jo ik bosa bhejtā huuñ kabhī

to shola us badan-e-pāk se nikaltā hai

mile agar na kahīñ bhī vo be-libās badan

to mere dīda-e-namnāk se nikaltā hai

utārtā hai mujhe niind ke niastāñ meñ

abhī vo ḳhvāb rag-e-tāk se nikaltā hai

fasīl-e-fahm ke andar bhī kuchh nahīñ maujūd

na koī ḳhema-e-idrāk se nikaltā hai

dhueñ kī tarha se ik phuul mere hone kā

kabhī zamīñ kabhī aflāk se nikaltā hai

mire sivā bhī koī hai jo mere hote hue

badal badal ke mirī ḳhaak se nikaltā hai

ye mojaze se koī kam nahīñ 'zafar' apnā

jo kaam us but-e-chālāk se nikaltā hai

wahi mere KHas-o-KHashak se nikalta hai

jo rang sa teri poshak se nikalta hai

karega kyun na mere baad hasraton ka shumar

tera bhi hissa in imlak se nikalta hai

hawa ke sath jo ek bosa bhejta hun kabhi

to shola us badan-e-pak se nikalta hai

mile agar na kahin bhi wo be-libas badan

to mere dida-e-namnak se nikalta hai

utarta hai mujhe nind ke niastan mein

abhi wo KHwab rag-e-tak se nikalta hai

fasil-e-fahm ke andar bhi kuchh nahin maujud

na koi KHema-e-idrak se nikalta hai

dhuen ki tarha se ek phul mere hone ka

kabhi zamin kabhi aflak se nikalta hai

mere siwa bhi koi hai jo mere hote hue

badal badal ke meri KHak se nikalta hai

ye mojaze se koi kam nahin 'zafar' apna

jo kaam us but-e-chaalak se nikalta hai