wajh-e-taskin-e-junun wasl-e-nigaran bhi nahin

vaj.h-e-taskīn-e-junūñ vasl-e-nigārāñ bhī nahīñ

ishq āsāñ hai magar is qadar āsāñ bhī nahīñ

har tajallī ke liye zarf-e-nazar hai darkār

jalva arzāñ hai magar is qadar arzāñ bhī nahīñ

jaane kyā soch ke har raah meñ ruk jaatā huuñ

us se milne kā kisī moḌ pe imkāñ bhī nahīñ

har nafas khīñch rahā hai koī rag rag se lahū

aur nashtar koī paivast-e-rag-e-jāñ bhī nahīñ

qāfile haiñ ki guzarte hī chale jaate haiñ

manzileñ haiñ ki kisī samt numāyāñ bhī nahīñ

gul kā kyā zikr ki ai dost mire dāman par

ek muddat se kisī ḳhaar kā ehsāñ bhī nahīñ

kaun samjhegā mire zarf-e-junūñ kī vus.at

maiñ pareshāñ huuñ mirā haal pareshāñ bhī nahīñ

tū ye ilzām mire zarf-e-junūñ par na tarāsh

ishq kāfir bhī nahīñ ishq musalmāñ bhī nahīñ

'shor' uThā duuñ maiñ gul-o-lāla ke parde lekin

yaañ koī mahram-e-asrār-e-gulistāñ bhī nahīñ

wajh-e-taskin-e-junun wasl-e-nigaran bhi nahin

ishq aasan hai magar is qadar aasan bhi nahin

har tajalli ke liye zarf-e-nazar hai darkar

jalwa arzan hai magar is qadar arzan bhi nahin

jaane kya soch ke har rah mein ruk jata hun

us se milne ka kisi moD pe imkan bhi nahin

har nafas khinch raha hai koi rag rag se lahu

aur nashtar koi paiwast-e-rag-e-jaan bhi nahin

qafile hain ki guzarte hi chale jate hain

manzilen hain ki kisi samt numayan bhi nahin

gul ka kya zikr ki ai dost mere daman par

ek muddat se kisi KHar ka ehsan bhi nahin

kaun samjhega mere zarf-e-junun ki wusat

main pareshan hun mera haal pareshan bhi nahin

tu ye ilzam mere zarf-e-junun par na tarash

ishq kafir bhi nahin ishq musalman bhi nahin

'shor' uTha dun main gul-o-lala ke parde lekin

yan koi mahram-e-asrar-e-gulistan bhi nahin