jis samt bhi dekhun nazar aata hai ki tum ho

jis samt bhī dekhūñ nazar aatā hai ki tum ho

ai jān-e-jahāñ ye koī tum sā hai ki tum ho

ye ḳhvāb hai ḳhushbū hai ki jhoñkā hai ki pal hai

ye dhund hai bādal hai ki saayā hai ki tum ho

is diid kī saa.at meñ ka.ī rañg haiñ larzāñ

maiñ huuñ ki koī aur hai duniyā hai ki tum ho

dekho ye kisī aur kī āñkheñ haiñ ki merī

dekhūñ ye kisī aur kā chehra hai ki tum ho

ye umr-e-gurezāñ kahīñ Thahre to ye jānūñ

har saañs meñ mujh ko yahī lagtā hai ki tum ho

har bazm meñ mauzū-e-suḳhan dil-zadagāñ kā

ab kaun hai shīrīñ hai ki lailā hai ki tum ho

ik dard kā phailā huā sahrā hai ki maiñ huuñ

ik mauj meñ aayā huā dariyā hai ki tum ho

vo vaqt na aa.e ki dil-e-zār bhī soche

is shahr meñ tanhā koī ham sā hai ki tum ho

ābād ham āshufta-saroñ se nahīñ maqtal

ye rasm abhī shahr meñ zinda hai ki tum ho

ai jān-e-'farāz' itnī bhī taufīq kise thī

ham ko ġham-e-hastī bhī gavārā hai ki tum ho

jis samt bhi dekhun nazar aata hai ki tum ho

ai jaan-e-jahan ye koi tum sa hai ki tum ho

ye KHwab hai KHushbu hai ki jhonka hai ki pal hai

ye dhund hai baadal hai ki saya hai ki tum ho

is did ki saat mein kai rang hain larzan

main hun ki koi aur hai duniya hai ki tum ho

dekho ye kisi aur ki aankhen hain ki meri

dekhun ye kisi aur ka chehra hai ki tum ho

ye umr-e-gurezan kahin Thahre to ye jaanun

har sans mein mujh ko yahi lagta hai ki tum ho

har bazm mein mauzu-e-suKHan dil-zadagan ka

ab kaun hai shirin hai ki laila hai ki tum ho

ek dard ka phaila hua sahra hai ki main hun

ek mauj mein aaya hua dariya hai ki tum ho

wo waqt na aae ki dil-e-zar bhi soche

is shahr mein tanha koi hum sa hai ki tum ho

aabaad hum aashufta-saron se nahin maqtal

ye rasm abhi shahr mein zinda hai ki tum ho

ai jaan-e-'faraaz' itni bhi taufiq kise thi

hum ko gham-e-hasti bhi gawara hai ki tum ho