waqar-e-shah-e-zawil-iqtadar dekh chuke

vaqār-e-shāh-e-zavil-iqtadār dekh chuke

zuhūr-e-qudrat-e-parvardigār dekh chuke

naqāb khol ke rū-e-nigār dekh chuke

kuchh ek baar nahīñ laakh baar dekh chuke

jahāñ ke aish-o-ġham-e-rozgār dekh chuke

jo dekhtā thā so parvardigār dekh chuke

vo jīte-jī hue iizā se naza.a kī āgāh

jo sadme tere shab-e-intizār dekh chuke

ḳhudā ke vāste ab chhoḌ jism-e-ḳhākī ko

aziyyateñ bahut o jān-e-zār dekh chuke

junūñ ne ḳhuub dikhā.ī bahār-e-jeb-o-kanār

havā meñ uḌte hue taar taar dekh chuke

vo qaul ġhair ko dete haiñ lete haiñ iqrār

tirī taraf ko dil-e-be-qarār dekh chuke

yaqīñ hai ab na kareñ mere qatl meñ tāḳhīr

fasāñ chaTā ke vo ḳhanjar kī dhaar dekh chuke

na Daal pech meñ ḳhātir na ab pareshāñ kar

bahut se dard-e-sar o zulf-e-yār dekh chuke

kare vo zīnat-e-fitrāk yā halāl kare

kahīñ idhar ko bhī vo shahsavār dekh chuke

na pahuñchā ek bhī zarra tumhāre dāman tak

uḌā ke ḳhaak bhī ham ḳhāksār dekh chuke

hue safed-o-siyāh-e-jahān se vāqif

bahut sī gardish-e-lail-o-nahār dekh chuke

kiye haiñ ḳhuub se nazzāre bāġh-e-hastī ke

jahāñ ko bas mire parvardigār dekh chuke

ilāhī tū ne sharaf jis ko āsmāñ pe diyā

vo sar-zamīn bhī ye ḳhāksār dekh chuke

nahīñ hai ek meñ himmat ye vo zamāna hai

ġharīb dekh chuke māl-dār dekh chuke

tahī hai nashsha-e-ulfat se ye ḳhum-e-gardūñ

sharābeñ pī ke tire bāda-ḳhvār dekh chuke

kulāh-e-kaj ko haTā kar dikhā diyā abrū

qasam alī kī khiñchī zul-fiqār dekh chuke

bhalā vo ḳhaak kareñ qasd bazm-e-hastī kā

jo log rāhat-e-kunj-mazār dekh chuke

huā yaqīn farishtoñ ko ḳhāksārī kā

kafan likhā jo ye ḳhatt-e-ġhubār dekh chuke

amāme-bāz jo ye kanThe ghaTTe vaale haiñ

jahāñ meñ jaise haiñ zī-e'tibār dekh chuke

aThā.ī-gīre haiñ sab ja.al-sāz haiñ mufsid

kuchh ek do nahīñ ham to hazār dekh chuke

sivā.e zāt-e-ḳhudā sab ke vāste hai fanā

sabāt-e-hasti-e-nā-pā.edār dekh chuke

qusūr-e-baḳht hai phir jaa.eñ ab agar mahrūm

dar-e-karīm to ummīd-vār dekh chuke

hazār-shukr ki baaqī nahīñ koī hasrat

bahār terī bhī o gul-ezār dekh chuke

najaf ko le ga.e mayyat farishta-e-naqqāl

aziiz khol ke merā mazār dekh chuke

faqīr bhī mutarassid nigāh-e-lutf kā hai

idhar bhī 'rind' mirā shahryār dekh chuke

waqar-e-shah-e-zawil-iqtadar dekh chuke

zuhur-e-qudrat-e-parwardigar dekh chuke

naqab khol ke ru-e-nigar dekh chuke

kuchh ek bar nahin lakh bar dekh chuke

jahan ke aish-o-gham-e-rozgar dekh chuke

jo dekhta tha so parwardigar dekh chuke

wo jite-ji hue iza se naza ki aagah

jo sadme tere shab-e-intizar dekh chuke

KHuda ke waste ab chhoD jism-e-KHaki ko

aziyyaten bahut o jaan-e-zar dekh chuke

junun ne KHub dikhai bahaar-e-jeb-o-kanar

hawa mein uDte hue tar tar dekh chuke

wo qaul ghair ko dete hain lete hain iqrar

teri taraf ko dil-e-be-qarar dekh chuke

yaqin hai ab na karen mere qatl mein taKHir

fasan chaTa ke wo KHanjar ki dhaar dekh chuke

na Dal pech mein KHatir na ab pareshan kar

bahut se dard-e-sar o zulf-e-yar dekh chuke

kare wo zinat-e-fitrak ya halal kare

kahin idhar ko bhi wo shahsawar dekh chuke

na pahuncha ek bhi zarra tumhaare daman tak

uDa ke KHak bhi hum KHaksar dekh chuke

hue safed-o-siyah-e-jahan se waqif

bahut si gardish-e-lail-o-nahaar dekh chuke

kiye hain KHub se nazzare bagh-e-hasti ke

jahan ko bas mere parwardigar dekh chuke

ilahi tu ne sharaf jis ko aasman pe diya

wo sar-zamin bhi ye KHaksar dekh chuke

nahin hai ek mein himmat ye wo zamana hai

gharib dekh chuke mal-dar dekh chuke

tahi hai nashsha-e-ulfat se ye KHum-e-gardun

sharaben pi ke tere baada-KHwar dekh chuke

kulah-e-kaj ko haTa kar dikha diya abru

qasam ali ki khinchi zul-fiqar dekh chuke

bhala wo KHak karen qasd bazm-e-hasti ka

jo log rahat-e-kunj-mazar dekh chuke

hua yaqin farishton ko KHaksari ka

kafan likha jo ye KHatt-e-ghubar dekh chuke

amame-baz jo ye kanThe ghaTTe wale hain

jahan mein jaise hain zi-e'tibar dekh chuke

aThai-gire hain sab jal-saz hain mufsid

kuchh ek do nahin hum to hazar dekh chuke

siwae zat-e-KHuda sab ke waste hai fana

sabaat-e-hasti-e-na-paedar dekh chuke

qusur-e-baKHt hai phir jaen ab agar mahrum

dar-e-karim to ummid-war dekh chuke

hazar-shukr ki baqi nahin koi hasrat

bahaar teri bhi o gul-ezar dekh chuke

najaf ko le gae mayyat farishta-e-naqqal

aziz khol ke mera mazar dekh chuke

faqir bhi mutarassid nigah-e-lutf ka hai

idhar bhi 'rind' mera shahryar dekh chuke