waqt-e-qayam dast-e-qaza ne nahin diya

vaqt-e-qayām dast-e-qazā ne nahīñ diyā

chalne lage to saath havā ne nahīñ diyā

pahle hī marhale meñ qalam ho ke rah ga.e

dast-e-hunar ko haath dikhāne nahīñ diyā

girnā to kyā burā thā magar us ko kyā kaheñ

jo gir gayā to uThne uThāne nahīñ diyā

ab un kī kaj-ravī se shikāyāt haiñ hameñ

ham ne hī un ko raah pe aane nahīñ diyā

do chaar kāreñ koThiyāñ das biis laakh bas

is se ziyāda ḳhauf-e-ḳhudā ne nahīñ diyā

maiñ sirf telephone kā ehsānmand huuñ

un kā payām bād-e-sabā ne nahīñ diyā

us yār-e-shoḳh-chashm se 'ḳhālid' kā irtibāt

ik raaz thā ki jis ko chhupāne nahīñ diyā

waqt-e-qayam dast-e-qaza ne nahin diya

chalne lage to sath hawa ne nahin diya

pahle hi marhale mein qalam ho ke rah gae

dast-e-hunar ko hath dikhane nahin diya

girna to kya bura tha magar us ko kya kahen

jo gir gaya to uThne uThane nahin diya

ab un ki kaj-rawi se shikayat hain hamein

hum ne hi un ko rah pe aane nahin diya

do chaar karen koThiyan das bis lakh bas

is se ziyaada KHauf-e-KHuda ne nahin diya

main sirf telephone ka ehsanmand hun

un ka payam baad-e-saba ne nahin diya

us yar-e-shoKH-chashm se 'KHalid' ka irtibaat

ek raaz tha ki jis ko chhupane nahin diya