waqt kai bosida kaghaz pe raqam hone ko hai

vaqt kai bosīda kāġhaz pe raqam hone ko hai

lamha-e-maujūd agle pal jo kam hone ko hai

merī vahshat se kabhī sairāb thā dasht-e-junūñ

ab mirī dīvāngī kā sar qalam hone ko hai

us ke jānib-dār haiñ saare mirā koī nahīñ

al-madad ai dil sar-e-pindār ḳham hone ko hai

zehn kahtā hai ziyāda vaqt legā kār-e-ishq

dil to kahtā hai ajī bas ek dam hone ko hai

ik nayā tarz-e-sitam ījād karnā hai use

ik na.ī tarkīb se mujh pe sitam hone ko hai

ai ḳhudā-e-mai-kada merī madad ko jald aa

terā banda āshiq-e-dair-o-haram hone ko hai

zindagī kuchh roz se kyuuñ mehrbāñ hai be-sabab

kyā kisī āshob kā ham pe karam hone ko hai

khīñch laa.ī jānib-e-dariyā hameñ bhī tishnagī

ab gulū-e-ḳhushk kā ḳhanjar pe ram hone ko hai

waqt kai bosida kaghaz pe raqam hone ko hai

lamha-e-maujud agle pal jo kam hone ko hai

meri wahshat se kabhi sairab tha dasht-e-junun

ab meri diwangi ka sar qalam hone ko hai

us ke jaanib-dar hain sare mera koi nahin

al-madad ai dil sar-e-pindar KHam hone ko hai

zehn kahta hai ziyaada waqt lega kar-e-ishq

dil to kahta hai aji bas ek dam hone ko hai

ek naya tarz-e-sitam ijad karna hai use

ek nai tarkib se mujh pe sitam hone ko hai

ai KHuda-e-mai-kada meri madad ko jald aa

tera banda aashiq-e-dair-o-haram hone ko hai

zindagi kuchh roz se kyun mehrban hai be-sabab

kya kisi aashob ka hum pe karam hone ko hai

khinch lai jaanib-e-dariya hamein bhi tishnagi

ab gulu-e-KHushk ka KHanjar pe ram hone ko hai