waqt ke har ek naqsh ka mani itna badla badla hoga

vaqt ke har ik naqsh kā ma.anī itnā badlā badlā hogā

mere vahm-o-gumān meñ kab thā ishq kā manzar aisā hogā

aaj mujhe apnī āñkhoñ se us ke qurb kī ḳhushbū aa.ī

merī nazar se us ne shāyad apne-āp ko dekhā hogā

lams ke is kore tālāb meñ chāñd kā pahlā aks tumhī ho

kaise nūr-jahānī sur meñ kis kis se vo kahtā hogā

sub.h sunahrī kyuuñ hai itnī shaam meñ itnī laalī kyuuñ hai

vaqt ne shāyad terī aañkh kī shabnam se muñh dhoyā hogā

aaj maiñ ā.īne meñ apnī sūrat tak pahchān na paayā

soch rahā huuñ mujh se ziyāda kaun is shahr meñ tanhā hogā

chhoḌ 'faqīh' ye honī kā sur anhonī kī taan lagāo

honī meñ hai koī hunar kyā honī ko to honā hogā

waqt ke har ek naqsh ka mani itna badla badla hoga

mere wahm-o-guman mein kab tha ishq ka manzar aisa hoga

aaj mujhe apni aankhon se us ke qurb ki KHushbu aai

meri nazar se us ne shayad apne-ap ko dekha hoga

lams ke is kore talab mein chand ka pahla aks tumhi ho

kaise nur-jahani sur mein kis kis se wo kahta hoga

subh sunahri kyun hai itni sham mein itni lali kyun hai

waqt ne shayad teri aankh ki shabnam se munh dhoya hoga

aaj main aaine mein apni surat tak pahchan na paya

soch raha hun mujh se ziyaada kaun is shahr mein tanha hoga

chhoD 'faqih' ye honi ka sur anhoni ki tan lagao

honi mein hai koi hunar kya honi ko to hona hoga