waqt ke tufani sagar mein krodh kapaT ke rele hain

vaqt ke tūfānī sāgar meñ krodh kapaT ke rele haiñ

lekin aas ke māñjhī har lahza maujoñ se khele haiñ

pag pag kāñTe manziloñ sahrā kosoñ jañgal bele haiñ

safar-e-zīst kaThin hai yaaro raah meñ laakh jhamele haiñ

alakh jamā.e dhūnī ramā.e dhyān lagā.e rahte haiñ

pyaar hamārā maslak hai ham prem-gurū ke chele haiñ

rāhzanoñ se ghabrā kar sab sāthī sañgat chhoḌ ga.e

aur pur-ḳhauf Dagar par garm-e-safar ham aaj akele haiñ

husn kī daulat us kī hai aur vasl kī ishrat bhī us kī

jis ne pal pal hijr meñ kaaTā jaur sahe dukh jhele haiñ

bāzī-gāh-e-dār-o-rasan meñ mai-kada-e-fikr-o-fan meñ

ham rindoñ se raunaq hai ham durveshoñ se mele haiñ

jīvan kī komal ablā kā svayamvar rachne vaalā hai

aao salā-e-ām hai sab ko jitne bhī albele haiñ

waqt ke tufani sagar mein krodh kapaT ke rele hain

lekin aas ke manjhi har lahza maujon se khele hain

pag pag kanTe manzilon sahra koson jangal bele hain

safar-e-zist kaThin hai yaro rah mein lakh jhamele hain

alakh jamae dhuni ramae dhyan lagae rahte hain

pyar hamara maslak hai hum prem-guru ke chele hain

rahzanon se ghabra kar sab sathi sangat chhoD gae

aur pur-KHauf Dagar par garm-e-safar hum aaj akele hain

husn ki daulat us ki hai aur wasl ki ishrat bhi us ki

jis ne pal pal hijr mein kaTa jaur sahe dukh jhele hain

bazi-gah-e-dar-o-rasan mein mai-kada-e-fikr-o-fan mein

hum rindon se raunaq hai hum durweshon se mele hain

jiwan ki komal abla ka swayamwar rachne wala hai

aao sala-e-am hai sab ko jitne bhi albele hain