waqt ke zalim samundar mein pareshani ke sath

vaqt ke zālim samundar meñ pareshānī ke saath

Duub jaatā hai koī kyuuñ itnī āsānī ke saath

merī sāñsoñ kī mahak kā bhī bahut charchā huā

raat jab maiñ ne gizārī raat kī raanī ke saath

maiñ vahī huuñ aur merā martaba mujh se buland

naam apnā le rahā huuñ maiñ bhī hairānī ke saath

maiñ ne to kuchh āstīñ ke saañp ginvā.e the bas

tum ne kyuuñ āñkheñ milā.ī haiñ pashemānī ke saath

karbalā vaale agar haiñ mohtaram to mohtaram

nosh mat jām-e-shahādat kījiye paanī ke saath

ik tabassum kā bharam ābād hoñToñ par kiye

jī rahe haiñ log apnī apnī vīrānī ke saath

mar gayā 'misdāq' bhī sultān-Tīpū kī tarah

dekh kar hamrāz apnā dushman-e-jānī ke saath

waqt ke zalim samundar mein pareshani ke sath

Dub jata hai koi kyun itni aasani ke sath

meri sanson ki mahak ka bhi bahut charcha hua

raat jab main ne gizari raat ki rani ke sath

main wahi hun aur mera martaba mujh se buland

nam apna le raha hun main bhi hairani ke sath

main ne to kuchh aastin ke sanp ginwae the bas

tum ne kyun aankhen milai hain pashemani ke sath

karbala wale agar hain mohtaram to mohtaram

nosh mat jam-e-shahadat kijiye pani ke sath

ek tabassum ka bharam aabaad honTon par kiye

ji rahe hain log apni apni virani ke sath

mar gaya 'misdaq' bhi sultan-Tipu ki tarah

dekh kar hamraaz apna dushman-e-jaani ke sath