waqt KHush-KHush kaTne ka mashwara dete hue

vaqt ḳhush-ḳhush kāTne kā mashvara dete hue

ro paḌā vo aap mujh ko hausla dete hue

us se kab dekhī ga.ī thī mere ruḳh kī murdanī

pher letā thā vo muñh mujh ko davā dete hue

ḳhvāb-e-be-ta.abīr sī socheñ mire kis kaam kī

sochtā itnā to vo dast-e-atā dete hue

be-zabānī baḳhsh dī ḳhud-ehtisābī ne mujhe

hoñT sil jaate haiñ duniyā ko gila dete hue

apnī rah masdūd kar degā yahī baḌhtā hujūm

ye na sochā har kisī ko rāsta dete hue

āp-apne qatl meñ shāmil thā maiñ maqtūl-e-shauq

ye khulā mujh par talab kā ḳhūñ-bahā dete hue

vo hameñ jab tak nazar aatā rahā takte rahe

giilī āñkhoñ ukhḌe lafzoñ se duā dete hue

jaane kis dahshat kā saaya us ko mohr-e-lab huā

Dar rahā hai vo mujhe khul kar sadā dete hue

be-amāñ thā aap lekin mo.ajaza hai ye 'riyāz'

hāla-e-shafqat thā us ko aasrā dete hue

waqt KHush-KHush kaTne ka mashwara dete hue

ro paDa wo aap mujh ko hausla dete hue

us se kab dekhi gai thi mere ruKH ki murdani

pher leta tha wo munh mujh ko dawa dete hue

KHwab-e-be-tabir si sochen mere kis kaam ki

sochta itna to wo dast-e-ata dete hue

be-zabani baKHsh di KHud-ehtisabi ne mujhe

honT sil jate hain duniya ko gila dete hue

apni rah masdud kar dega yahi baDhta hujum

ye na socha har kisi ko rasta dete hue

aap-apne qatl mein shamil tha main maqtul-e-shauq

ye khula mujh par talab ka KHun-baha dete hue

wo hamein jab tak nazar aata raha takte rahe

gili aankhon ukhDe lafzon se dua dete hue

jaane kis dahshat ka saya us ko mohr-e-lab hua

Dar raha hai wo mujhe khul kar sada dete hue

be-aman tha aap lekin moajaza hai ye 'riyaz'

haala-e-shafqat tha us ko aasra dete hue