waqt ki maujon se har dam khelta rahta hun main

vaqt kī maujoñ se har dam kheltā rahtā huuñ maiñ

zindagī kyā chiiz hai ye sochtā rahtā huuñ maiñ

lauT aate haiñ parinde chhū ke niilā āsmāñ

aur uḌne ke liye par toltā rahtā huuñ maiñ

zindagī kā zikr aatā hai to paanī par kahīñ

uñgliyoñ se kuchh lakīreñ khīñchtā rahtā huuñ maiñ

ye na pūchho kyā huuñ maiñ hai aur kyā merī bisāt

aa.ina huuñ roz bantā TūTtā rahtā huuñ maiñ

is tarah kartā huuñ ḳhushiyoñ meñ izāfa aur bhī

apnī ḳhushiyāñ dūsroñ meñ bāñTtā rahtā huuñ maiñ

sochtā huuñ is liye shāyad nahīñ manzil milī

har kisī se rāh-e-manzil pūchhtā rahtā huuñ maiñ

jab bhī chaltī hai kabhī dukh-dard kī āñdhī 'kañval'

giile kapḌoñ kī tarah bas sūkhtā rahtā huuñ maiñ

waqt ki maujon se har dam khelta rahta hun main

zindagi kya chiz hai ye sochta rahta hun main

lauT aate hain parinde chhu ke nila aasman

aur uDne ke liye par tolta rahta hun main

zindagi ka zikr aata hai to pani par kahin

ungliyon se kuchh lakiren khinchta rahta hun main

ye na puchho kya hun main hai aur kya meri bisat

aaina hun roz banta TuTta rahta hun main

is tarah karta hun KHushiyon mein izafa aur bhi

apni KHushiyan dusron mein banTta rahta hun main

sochta hun is liye shayad nahin manzil mili

har kisi se rah-e-manzil puchhta rahta hun main

jab bhi chalti hai kabhi dukh-dard ki aandhi 'kanwal'

gile kapDon ki tarah bas sukhta rahta hun main