waqt ki raftar ko parkha karo

vaqt kī raftār ko parkhā karo

band har jhagḌe kā darvāza karo

muñh se niklī baat kī hogī pakaḌ

aage pīchhe soch kar bolā karo

sirf ġhairoñ kī zabāneñ siikh kar

mashvara hai ḳhud ko mat gūñgā karo

ahd puurā hī nahīñ karnā hai jab

zindagī bhar va.ada-e-fardā karo

tum agar nāzāñ ho apne aap par

vaqt-e-fursat aa.ina dekhā karo

shahr kī āḳhir ye hālat kab talak

ahl-e-darbhanga zarā sochā karo

har taraf 'anjum' na.e mazmūn kī

Dher sī haiñ titliyāñ pakḌā karo

waqt ki raftar ko parkha karo

band har jhagDe ka darwaza karo

munh se nikli baat ki hogi pakaD

aage pichhe soch kar bola karo

sirf ghairon ki zabanen sikh kar

mashwara hai KHud ko mat gunga karo

ahd pura hi nahin karna hai jab

zindagi bhar wada-e-farda karo

tum agar nazan ho apne aap par

waqt-e-fursat aaina dekha karo

shahr ki aaKHir ye haalat kab talak

ahl-e-darbhanga zara socha karo

har taraf 'anjum' nae mazmun ki

Dher si hain titliyan pakDa karo