waqt par aate hain na jate hain

vaqt par aate haiñ na jaate haiñ

roz iqrār bhuul jaate haiñ

vo jo be-vaj.h muskurāte haiñ

saikḌoñ vahm dil meñ aate haiñ

ashk-e-hasrat nikal ke dāman meñ

jaan se haath dho.e aate haiñ

jab tum aate nahīñ ho va.ade par

malak-ul-maut ko bulāte haiñ

so gayā baḳht jab se ro ro kar

saare ham-sāyoñ ko jagāte haiñ

un ko sharm-o-hayā nahīñ aatī

dil churā kar nazar churāte haiñ

be-ḳhatā hai vo āsmāñ mujrim

is ko ilzām kyuuñ lagāte haiñ

jaan kar ban ga.e haiñ ham bhole

chuTkiyoñ meñ kise uḌāte haiñ

tere kūche meñ ham bhī ab thak kar

dil ke mānind baiThe jaate haiñ

ġhair kyā aur us kī hastī kyā

aap kyuuñ muft ḳhauf khāte haiñ

koī taaza sitam kiyā ījād

dekh kar vo jo muskurāte haiñ

aag paanī meñ kyuuñ lagāte ho

nek jo log haiñ bujhāte haiñ

tum mire dil meñ ho to dekhūñ maiñ

huur o ġhilmāñ kahīñ samāte haiñ

maiñ ne pūchhī jo vaj.h-e-qatl kahā

Thahro dam le ke ham batāte haiñ

ishq tere tufail duniyā ke

tanzeñ sunte haiñ ta.ane khāte haiñ

be-sabab kyā bigaḌne kā baa.is

aap 'parvīñ' ko bhī banāte haiñ

waqt par aate hain na jate hain

roz iqrar bhul jate hain

wo jo be-wajh muskuraate hain

saikDon wahm dil mein aate hain

ashk-e-hasrat nikal ke daman mein

jaan se hath dhoe aate hain

jab tum aate nahin ho wade par

malak-ul-maut ko bulate hain

so gaya baKHt jab se ro ro kar

sare ham-sayon ko jagate hain

un ko sharm-o-haya nahin aati

dil chura kar nazar churaate hain

be-KHata hai wo aasman mujrim

is ko ilzam kyun lagate hain

jaan kar ban gae hain hum bhole

chuTkiyon mein kise uDate hain

tere kuche mein hum bhi ab thak kar

dil ke manind baiThe jate hain

ghair kya aur us ki hasti kya

aap kyun muft KHauf khate hain

koi taza sitam kiya ijad

dekh kar wo jo muskuraate hain

aag pani mein kyun lagate ho

nek jo log hain bujhate hain

tum mere dil mein ho to dekhun main

hur o ghilman kahin samate hain

main ne puchhi jo wajh-e-qatl kaha

Thahro dam le ke hum batate hain

ishq tere tufail duniya ke

tanzen sunte hain tane khate hain

be-sabab kya bigaDne ka bais

aap 'parwin' ko bhi banate hain