waqt se hum gila nahin karte

vaqt se ham gila nahīñ karte

kaam koī burā nahīñ karte

ashk bhī hoñ ruḳh-e-tabassum par

zindagī yuuñ jiyā nahīñ karte

husn vaalo zarā batāo nā

kyuuñ kisī se vafā nahīñ karte

kuchh to paate hī hoñge parvāne

be-vajah hī jalā nahīñ karte

dil hai yaarā koī makān nahīñ

har kisī ko diyā nahīñ karte

ishq kī ibtidā hai tum se agar

mujh pe kyuuñ intihā nahīñ karte

muskurānā to bhuul hī jaao

ashk bhī ab bahā nahīñ karte

tum ko āsān hai bhulā denā

ham magar ye kiyā nahīñ karte

ashk piine kī lat lagī ho jinheñ

jām-e-farhat piyā nahīñ karte

jin ke dil meñ junūn-o-ulfat ho

shauq-e-ḳhanda rakhā nahīñ karte

māh-e-kāmil ho tum ho aur meñ huuñ

ye nazāre dikhā nahīñ karte

maiñ burā huuñ magar anokhā huuñ

mere jaise milā nahīñ karte

ḳhaas hotī haiñ bāteñ kuchh apnī

sab se sab kuchh kahā nahīñ karte

dard ne sab sikhā diyā hai 'safīr'

varna ham to likhā nahīñ karte

waqt se hum gila nahin karte

kaam koi bura nahin karte

ashk bhi hon ruKH-e-tabassum par

zindagi yun jiya nahin karte

husn walo zara batao na

kyun kisi se wafa nahin karte

kuchh to pate hi honge parwane

be-wajah hi jala nahin karte

dil hai yara koi makan nahin

har kisi ko diya nahin karte

ishq ki ibtida hai tum se agar

mujh pe kyun intiha nahin karte

muskurana to bhul hi jao

ashk bhi ab baha nahin karte

tum ko aasan hai bhula dena

hum magar ye kiya nahin karte

ashk pine ki lat lagi ho jinhen

jam-e-farhat piya nahin karte

jin ke dil mein junun-o-ulfat ho

shauq-e-KHanda rakha nahin karte

mah-e-kaamil ho tum ho aur mein hun

ye nazare dikha nahin karte

main bura hun magar anokha hun

mere jaise mila nahin karte

KHas hoti hain baaten kuchh apni

sab se sab kuchh kaha nahin karte

dard ne sab sikha diya hai 'safir'

warna hum to likha nahin karte