wasl ka uske dil-e-zar tamannai hai

vasl kā us ke dil-e-zār tamannā.ī hai

na mulāqāt hai jis se na shanāsā.ī hai

qat.a ummīd ne dil kar diye yaksū sad shukr

shakl muddat meñ ye allāh ne dikhlā.ī hai

quvvat-e-dast-e-ḳhudā.ī hai shakebā.ī meñ

vaqt jab aa ke paḌā hai yahī kaam aa.ī hai

Dar nahīñ ġhair kā jo kuchh hai so apnā Dar hai

ham ne jab khaa.ī hai apne hī se zak khaa.ī hai

nashe meñ chuur na hoñ jhāñjh meñ maḳhmūr na hoñ

pand ye pīr-e-ḳharābāt ne farmā.ī hai

nazar aatī nahīñ ab dil meñ tamannā koī

baad muddat ke tamannā mirī bar aa.ī hai

baat sachchī kahī aur uñgliyāñ uTThīñ sab kī

sach meñ 'hālī' koī rusvā.ī sī rusvā.ī hai

wasl ka us ke dil-e-zar tamannai hai

na mulaqat hai jis se na shanasai hai

qata ummid ne dil kar diye yaksu sad shukr

shakl muddat mein ye allah ne dikhlai hai

quwwat-e-dast-e-KHudai hai shakebai mein

waqt jab aa ke paDa hai yahi kaam aai hai

Dar nahin ghair ka jo kuchh hai so apna Dar hai

hum ne jab khai hai apne hi se zak khai hai

nashe mein chur na hon jhanjh mein maKHmur na hon

pand ye pir-e-KHarabaat ne farmai hai

nazar aati nahin ab dil mein tamanna koi

baad muddat ke tamanna meri bar aai hai

baat sachchi kahi aur ungliyan uTThin sab ki

sach mein 'haali' koi ruswai si ruswai hai