wida-e-yar ka lamha Thahar gaya mujh mein

vidā-e-yār kā lamha Thahar gayā mujh meñ

maiñ ḳhud to zinda rahā vaqt mar gayā mujh meñ

sukūt-e-shām meñ chīḳheñ sunā.ī detī haiñ

tū jaate jaate ajab shor bhar gayā mujh meñ

vo pahle sirf mirī aañkh meñ samāyā thā

phir ek roz ragoñ tak utar gayā mujh meñ

kuchh aise dhyān meñ chehra tirā tulūa huā

ġhurūb-e-shām kā manzar nikhar gayā mujh meñ

maiñ us kī zaat se munkir thā aur phir ik din

vo apne hone kā elaan kar gayā mujh meñ

khañDar samajh ke mirī sair karne aayā thā

gayā to mausam-e-ġham phuul dhar gayā mujh meñ

galī meñ gūñjī ḳhamoshī kī chīḳh raat ke vaqt

tumhārī yaad kā bachcha sā Dar gayā mujh meñ

batā maiñ kyā karūñ dil naam ke is āñgan kā

tirī umiid pe jo saj-sañvar gayā mujh meñ

ye apne apne muqaddar kī baat hai 'fāris'

maiñ is meñ simTā rahā vo bikhar gayā mujh meñ

wida-e-yar ka lamha Thahar gaya mujh mein

main KHud to zinda raha waqt mar gaya mujh mein

sukut-e-sham mein chiKHen sunai deti hain

tu jate jate ajab shor bhar gaya mujh mein

wo pahle sirf meri aankh mein samaya tha

phir ek roz ragon tak utar gaya mujh mein

kuchh aise dhyan mein chehra tera tulua hua

ghurub-e-sham ka manzar nikhar gaya mujh mein

main us ki zat se munkir tha aur phir ek din

wo apne hone ka elan kar gaya mujh mein

khanDar samajh ke meri sair karne aaya tha

gaya to mausam-e-gham phul dhar gaya mujh mein

gali mein gunji KHamoshi ki chiKH raat ke waqt

tumhaari yaad ka bachcha sa Dar gaya mujh mein

bata main kya karun dil nam ke is aangan ka

teri umid pe jo saj-sanwar gaya mujh mein

ye apne apne muqaddar ki baat hai 'faris'

main is mein simTa raha wo bikhar gaya mujh mein