visal-o-hijr ke qisse na yun sunao hamein

visāl-o-hijr ke qisse na yuuñ sunāo hameñ

ab is azāb-e-shab-o-roz se bachāo hameñ

kisī bhī ghar meñ sahī raushnī to hai ham se

numūd-e-sub.h se pahle to mat bujhāo hameñ

nahīñ hai ḳhūn-e-shahīdāñ kī koī qadr yahāñ

lagā ke daav pe ham ko na yuuñ gañvāo hameñ

tamām umr kā saudā hai ek pal kā nahīñ

bahut hī soch samajh kar gale lagāo hameñ

guzar chuke haiñ maqām-e-junūñ se dīvāne

ye jaan lenā agar kal yahāñ na paao hameñ

hamāre ḳhuuñ se nikhar jaa.e ġham to kyā kahnā

baḌhāo dast-e-sitam daar par chaḌhāo hameñ

karishma-sāzī-e-fikr-o-nazar se kyā hāsil

bane ho ḳhizr to phir rāsta dikhāo hameñ

ye lamha bhar kā tasavvur to jān-levā hai

jo yaad aao to tā-umr yaad aao hameñ

kitāb-e-ishq haiñ lekin na itnī farsūda

ki be-paḌhe hī faqat mez par sajāo hameñ

ujaḌ na jaa.e urūs-e-suḳhan kī maañg kahīñ

ḳhayāl-o-fan kī na.ī jañg se bachāo hameñ

visal-o-hijr ke qisse na yun sunao hamein

ab is azab-e-shab-o-roz se bachao hamein

kisi bhi ghar mein sahi raushni to hai hum se

numud-e-subh se pahle to mat bujhao hamein

nahin hai KHun-e-shahidan ki koi qadr yahan

laga ke daw pe hum ko na yun ganwao hamein

tamam umr ka sauda hai ek pal ka nahin

bahut hi soch samajh kar gale lagao hamein

guzar chuke hain maqam-e-junun se diwane

ye jaan lena agar kal yahan na pao hamein

hamare KHun se nikhar jae gham to kya kahna

baDhao dast-e-sitam dar par chaDhao hamein

karishma-sazi-e-fikr-o-nazar se kya hasil

bane ho KHizr to phir rasta dikhao hamein

ye lamha bhar ka tasawwur to jaan-lewa hai

jo yaad aao to ta-umr yaad aao hamein

kitab-e-ishq hain lekin na itni farsuda

ki be-paDhe hi faqat mez par sajao hamein

ujaD na jae urus-e-suKHan ki mang kahin

KHayal-o-fan ki nai jang se bachao hamein