visal-o-hijr se wabasta tohmaten bhi gain

visāl-o-hijr se vābasta tohmateñ bhī ga.iiñ

vo fāsle bhī ga.e ab vo qurbateñ bhī ga.iiñ

diloñ kā haal to ye hai ki rabt hai na gurez

mohabbateñ to ga.iiñ thī adāvateñ bhī ga.iiñ

lubhā liyā hai bahut dil ko rasm-e-duniyā ne

sitamgaroñ se sitam kī shikāyateñ bhī ga.iiñ

ġhurūr-e-kaj-kulahī jin ke dam se qaa.em thā

vo jur.ateñ bhī ga.iiñ vo jasārateñ bhī ga.iiñ

na ab vo shiddat-e-āvārgī na vahshat-e-dil

hamāre naam kī kuchh aur shohrateñ bhī ga.iiñ

dil-e-tabāh thā be-nām hasratoñ kā dayār

so ab to dil se vo be-nām hasrateñ bhī ga.iiñ

hue haiñ jab se barahna zarūratoñ ke badan

ḳhayāl-o-ḳhvāb kī pinhāñ nazākateñ bhī ga.iiñ

hujūm-e-sarv-o-saman hai na sail-e-nik.hat-o-rañg

vo qāmateñ bhī ga.iiñ vo qayāmateñ bhī ga.iiñ

bhulā diye ġham-e-duniyā ne ishq ke ādāb

kisī ke naaz uThāne kī fursateñ bhī ga.iiñ

karegā kaun matā-e-ḳhulūs yuuñ arzāñ

hamāre saath hamārī saḳhvāteñ bhī ga.iiñ

na chāñd meñ hai vo chehra na sarv meñ hai vo jism

gayā vo shaḳhs to us kī shabāhateñ bhī ga.iiñ

gayā vo daur-e-ġham-e-intizār-e-yār 'sahar'

aur apnī zaat pe dānista zahmateñ bhī ga.iiñ

visal-o-hijr se wabasta tohmaten bhi gain

wo fasle bhi gae ab wo qurbaten bhi gain

dilon ka haal to ye hai ki rabt hai na gurez

mohabbaten to gain thi adawaten bhi gain

lubha liya hai bahut dil ko rasm-e-duniya ne

sitamgaron se sitam ki shikayaten bhi gain

ghurur-e-kaj-kulahi jin ke dam se qaem tha

wo juraten bhi gain wo jasaraten bhi gain

na ab wo shiddat-e-awargi na wahshat-e-dil

hamare nam ki kuchh aur shohraten bhi gain

dil-e-tabah tha be-nam hasraton ka dayar

so ab to dil se wo be-nam hasraten bhi gain

hue hain jab se barahna zaruraton ke badan

KHayal-o-KHwab ki pinhan nazakaten bhi gain

hujum-e-sarw-o-saman hai na sail-e-nikhat-o-rang

wo qamaten bhi gain wo qayamaten bhi gain

bhula diye gham-e-duniya ne ishq ke aadab

kisi ke naz uThane ki fursaten bhi gain

karega kaun mata-e-KHulus yun arzan

hamare sath hamari saKHwaten bhi gain

na chand mein hai wo chehra na sarw mein hai wo jism

gaya wo shaKHs to us ki shabahaten bhi gain

gaya wo daur-e-gham-e-intizar-e-yar 'sahar'

aur apni zat pe danista zahmaten bhi gain