wo aaenge wo aate hain wo aane ko hain wo aae

vo ā.eñge vo aate haiñ vo aane ko haiñ vo aa.e

tasavvur ko vo bahlā.eñ tasavvur ham ko bahlā.e

vo chamkā chāñd chhiTkī chāñdnī taare nikal aa.e

vo kyā aa.e zamīñ par āsmāñ ne phuul barsā.e

azal se tā-abad hai jalva farmā husn-e-sad-sheva

vahī sāhib-nazar hai jo barābar dekhtā jaa.e

kahāñ insāñ kahāñ 'aql-o-ḳhirad kī beḌiyāñ tauba

zarā bhī 'aql ho to aadmī dīvāna ho jaa.e

vajūd-e-nūr par mauqūf haiñ āsār-e-zulmat bhī

na hogī raushnī to phir kahāñ jā.eñge ye saa.e

'zahīn' āsūdgī rāh-e-talab meñ hai ziyāñ-kārī

hazāroñ kos haiñ vo duur jo ik lamha sustā.e

wo aaenge wo aate hain wo aane ko hain wo aae

tasawwur ko wo bahlaen tasawwur hum ko bahlae

wo chamka chand chhiTki chandni tare nikal aae

wo kya aae zamin par aasman ne phul barsae

azal se ta-abad hai jalwa farma husn-e-sad-shewa

wahi sahib-nazar hai jo barabar dekhta jae

kahan insan kahan 'aql-o-KHirad ki beDiyan tauba

zara bhi 'aql ho to aadmi diwana ho jae

wajud-e-nur par mauquf hain aasar-e-zulmat bhi

na hogi raushni to phir kahan jaenge ye sae

'zahin' aasudgi rah-e-talab mein hai ziyan-kari

hazaron kos hain wo dur jo ek lamha sustae