wo aalamgir jalwa aur husn-e-mustarak tera

vo ālamgīr jalva aur husn-e-mustarak terā

ḳhudā jaane in āñkhoñ ko huā kis kis pe shak terā

batā had se sivā ham paañv phailā.eñ kidhar jaa.eñ

faqat do gaz zamīñ apnī hai aur sātoñ falak terā

kiyā ai sone vaale rahm sub.h-e-vasl ne tujh par

ki juuñ juuñ khultī haiñ āñkheñ miTā jaatā hai shak terā

bas ab had hai ki ġhairoñ tak kā dāman jā ke pakḌā hai

Dige kis kis jagah ham ho gayā kis kis pe shak terā

tire naqsh-e-qadam kī gard tak pahuñche na vāmāñda

bahut pīchhā kiyā ai kārvāñ kosoñ talak terā

ġhizā-e-rūh hai ai husn tū apnī malāhat se

har ik ke zā.iqe meñ Thiik hai āb-o-namak terā

agar āñkheñ salāmat haiñ to kyā kyā kuchh dikhā.egā

yahī phailā huā jalva samā se tā-samak terā

mirī ham-dardiyoñ se ho ga.ī ġhairoñ ko ik ibrat

liyā ghabrā ke jab jab nām-e-nāmī be-dhaḌak terā

na pūchho ishq ne ġhairat se kyā kyā rañg badlā hai

ḳhayāl aayā hai saath auroñ ke jab jab mushtarak terā

faqat zāhid pe kyā mauqūf sab kī raal Tapkī hai

vo shoḳhī vo numū ke din vo chehra be-Dalak terā

bahut tū ne jab apne paañv phailā.e to kyā chāra

adab kartī rahī ai ashk muddat tak palak terā

abas uljhā ke rakkhā hai koī insāf bhī āḳhir

umīdeñ saath deñgī 'shād' āḳhir kab talak terā

wo aalamgir jalwa aur husn-e-mustarak tera

KHuda jaane in aankhon ko hua kis kis pe shak tera

bata had se siwa hum panw phailaen kidhar jaen

faqat do gaz zamin apni hai aur saton falak tera

kiya ai sone wale rahm subh-e-wasl ne tujh par

ki jun jun khulti hain aankhen miTa jata hai shak tera

bas ab had hai ki ghairon tak ka daman ja ke pakDa hai

Dige kis kis jagah hum ho gaya kis kis pe shak tera

tere naqsh-e-qadam ki gard tak pahunche na wamanda

bahut pichha kiya ai karwan koson talak tera

ghiza-e-ruh hai ai husn tu apni malahat se

har ek ke zaiqe mein Thik hai aab-o-namak tera

agar aankhen salamat hain to kya kya kuchh dikhaega

yahi phaila hua jalwa sama se ta-samak tera

meri ham-dardiyon se ho gai ghairon ko ek ibrat

liya ghabra ke jab jab nam-e-nami be-dhaDak tera

na puchho ishq ne ghairat se kya kya rang badla hai

KHayal aaya hai sath auron ke jab jab mushtarak tera

faqat zahid pe kya mauquf sab ki ral Tapki hai

wo shoKHi wo numu ke din wo chehra be-Dalak tera

bahut tu ne jab apne panw phailae to kya chaara

adab karti rahi ai ashk muddat tak palak tera

abas uljha ke rakkha hai koi insaf bhi aaKHir

umiden sath dengi 'shad' aaKHir kab talak tera