wo abr jo mai-KHwar ki turbat pe na barse

vo abr jo mai-ḳhvār kī turbat pe na barse

kah do ki ḳhudārā kabhī guzre na idhar se

itnā to huā aah shab-e-ġham ke asar se

fitrat kā jigar phuuT bahā chashm-e-sahar se

ummīd ne bhī yaas ke murdoñ ko pukārā

aa.ī koī āvāz na dil se na jigar se

nāseh ko bulāo mirā īmān sañbhāle

phir dekh liyā us ne usī ek nazar se

ḳhurshīd-e-qayāmat kī adā dekh rahā huuñ

miltī huī sūrat hai mire dāġh-e-jigar se

ek ek qadam par hai jahāñ ḳhanda-e-taqdīr

tadbīr guzartī hai usī rāhguzar se

ai ḳhanda-e-gulshan ye hai anjām-e-shab-e-aish

gul rote haiñ na muñh Dhāñp ke dāmān-e-sahar se

kuchh shān-e-karīmī ne is andāz se taulā

bhārī hī rahā dīda-e-tar dāman-e-tar se

ḳhatre meñ haiñ kuchh din se 'hafīz' ahl-e-do-ālam

har shab mire nāloñ kī laḌā.ī hai asar se

wo abr jo mai-KHwar ki turbat pe na barse

kah do ki KHudara kabhi guzre na idhar se

itna to hua aah shab-e-gham ke asar se

fitrat ka jigar phuT baha chashm-e-sahar se

ummid ne bhi yas ke murdon ko pukara

aai koi aawaz na dil se na jigar se

naseh ko bulao mera iman sanbhaale

phir dekh liya us ne usi ek nazar se

KHurshid-e-qayamat ki ada dekh raha hun

milti hui surat hai mere dagh-e-jigar se

ek ek qadam par hai jahan KHanda-e-taqdir

tadbir guzarti hai usi rahguzar se

ai KHanda-e-gulshan ye hai anjam-e-shab-e-aish

gul rote hain na munh Dhanp ke daman-e-sahar se

kuchh shan-e-karimi ne is andaz se taula

bhaari hi raha dida-e-tar daman-e-tar se

KHatre mein hain kuchh din se 'hafiz' ahl-e-do-alam

har shab mere nalon ki laDai hai asar se