wo abru yaad aate hain wo mizhgan yaad aate hain

vo abrū yaad aate haiñ vo mizhgāñ yaad aate haiñ

na pūchho kaise kaise tīr-o-paikāñ yaad aate haiñ

vo jin ke taht jhuk jaatā thā sar asnām ke aage

vahī bhūle hue ahkām-e-yazdāñ yaad aate haiñ

jo aksar bār-var hone se pahle TuuT jaate the

vahī ḳhasta shikasta ahd-o-paimāñ yaad aate haiñ

vo marmar kī tarah shaffāf aur hañste hue a.azā

hayāt-e-jāvidāñ ke sāz-o-sāmāñ yaad aate haiñ

gumāñ hotā hai vahshī nik.hatoñ ne bheñch Daalā hai

kuchh itne be-mahābā sumbulistāñ yaad aate haiñ

vo gul-andāz jin kā ḳhalq sarmāya thā jiine kā

vo ban ban kar charāġh-e-mahfil-e-jāñ yaad aate haiñ

ḳhayāl aatā hai jab bhī dilbaroñ kī ham-nashīnī kā

talātum rang ke ḳhushbū ke tūfāñ yaad aate haiñ

uḌī phirtī thī bosoñ kī chaTak jin kī fazāoñ meñ

vo ehsāsāt meñ Duube shabistāñ yaad aate haiñ

faqīh-o-shaiḳh ke zehnoñ meñ but hoñge ḳhudāoñ ke

maiñ insāñ huuñ mujhe to sirf insāñ yaad aate haiñ

piyāla shaam ko rakhtā huuñ jab bhī maiñ 'adam' aage

javāñ ham-joliyoñ ke rū-e-ḳhandāñ yaad aate haiñ

wo abru yaad aate hain wo mizhgan yaad aate hain

na puchho kaise kaise tir-o-paikan yaad aate hain

wo jin ke taht jhuk jata tha sar asnam ke aage

wahi bhule hue ahkaam-e-yazdan yaad aate hain

jo aksar bar-war hone se pahle TuT jate the

wahi KHasta shikasta ahd-o-paiman yaad aate hain

wo marmar ki tarah shaffaf aur hanste hue aaza

hayat-e-jawidan ke saz-o-saman yaad aate hain

guman hota hai wahshi nikhaton ne bhench Dala hai

kuchh itne be-mahaba sumbulistan yaad aate hain

wo gul-andaz jin ka KHalq sarmaya tha jine ka

wo ban ban kar charagh-e-mahfil-e-jaan yaad aate hain

KHayal aata hai jab bhi dilbaron ki ham-nashini ka

talatum rang ke KHushbu ke tufan yaad aate hain

uDi phirti thi boson ki chaTak jin ki fazaon mein

wo ehsasat mein Dube shabistan yaad aate hain

faqih-o-shaiKH ke zehnon mein but honge KHudaon ke

main insan hun mujhe to sirf insan yaad aate hain

piyala sham ko rakhta hun jab bhi main 'adam' aage

jawan ham-joliyon ke ru-e-KHandan yaad aate hain