wo andaz-e-husn-e-nazar awwal awwal

vo andāz-e-husn-e-nazar avval avval

vo jām-e-mai-e-tez-tar avval avval

daraḳhshāñ nigāhoñ meñ mā'sūm jalve

vo tanvīr-e-lā'l-o-guhar avval avval

vo chhāyā huā nashsha-e-naujavānī

vo ik 'ālam-e-karr-o-far avval avval

vo rā'nā.ī-e-husn-e-sāda-o-dilkash

vo ik jalva-e-kārgar avval avval

dil-o-dīda nāgāh mahv-e-tahayyur

kuchh is taur vo jalva-gar avval avval

rah-e-‘ishq-o-ulfat meñ ham yuuñ ravāñ haiñ

kisī kā ho jaise safar avval avval

nikhartā huā rang-e-ruḳh kā vo 'ālam

farozāñ ki jaise sahar avval avval

ba-har-nau’ ik husn-e-shah-kār-e-qudrat

vo ik paikar-e-ḳhūb-tar avval avval

vo ik shauq-e-paiham kā rangīñ tasarruf

du'ā avval avval asar avval avval

bayāñ kyā ho 'in'ām' āġhāz-e-ulfat

vo ik zauq-e-dīvāna-gar avval avval

wo andaz-e-husn-e-nazar awwal awwal

wo jam-e-mai-e-tez-tar awwal awwal

daraKHshan nigahon mein ma'sum jalwe

wo tanwir-e-la'l-o-guhar awwal awwal

wo chhaya hua nashsha-e-naujawani

wo ek 'alam-e-karr-o-far awwal awwal

wo ra'nai-e-husn-e-sada-o-dilkash

wo ek jalwa-e-kargar awwal awwal

dil-o-dida nagah mahw-e-tahayyur

kuchh is taur wo jalwa-gar awwal awwal

rah-e-‘ishq-o-ulfat mein hum yun rawan hain

kisi ka ho jaise safar awwal awwal

nikharta hua rang-e-ruKH ka wo 'alam

farozan ki jaise sahar awwal awwal

ba-har-nau’ ek husn-e-shah-kar-e-qudrat

wo ek paikar-e-KHub-tar awwal awwal

wo ek shauq-e-paiham ka rangin tasarruf

du'a awwal awwal asar awwal awwal

bayan kya ho 'in'am' aaghaz-e-ulfat

wo ek zauq-e-diwana-gar awwal awwal