wo anjuman ho ki maqtal lahu lahu hi rahe

vo anjuman ho ki maqtal lahū lahū hī rahe

jahāñ kahīñ bhī rahe ham to surḳh-rū hī rahe

vo daur hai ki ġham-e-vasl-o-hijr ek taraf

maiñ sochtā huuñ mohabbat kī aabrū hī rahe

na pūchh ham se zamāne ne kyā sulūk kiyā

bahut hai dil meñ agar terī aarzū hī rahe

ye mai-kada hai yahāñ ḳhūn-e-dil kī baat na kar

yahāñ to tazkira-e-bād-o-subū hī rahe

shab-e-firāq to āḳhir guzārnī Thahrī

jo vo nahīñ na sahī us kī guftugū hī rahe

ḳhudā kare na kabhī lazzat-e-safar kam ho

tamām-umr hameñ terī justujū hī rahe

bahār aa.ī bhī 'ḳhāvar' to kyā bahār aa.ī

chaman ke phuul to mahrūm-e-rañg-o-bū hī rahe

wo anjuman ho ki maqtal lahu lahu hi rahe

jahan kahin bhi rahe hum to surKH-ru hi rahe

wo daur hai ki gham-e-wasl-o-hijr ek taraf

main sochta hun mohabbat ki aabru hi rahe

na puchh hum se zamane ne kya suluk kiya

bahut hai dil mein agar teri aarzu hi rahe

ye mai-kada hai yahan KHun-e-dil ki baat na kar

yahan to tazkira-e-baad-o-subu hi rahe

shab-e-firaq to aaKHir guzarni Thahri

jo wo nahin na sahi us ki guftugu hi rahe

KHuda kare na kabhi lazzat-e-safar kam ho

tamam-umr hamein teri justuju hi rahe

bahaar aai bhi 'KHawar' to kya bahaar aai

chaman ke phul to mahrum-e-rang-o-bu hi rahe