وہ بات کیا تھی کہ جس کا اثر نہیں جاتا

وہ بات کیا تھی کہ جس کا اثر نہیں جاتا

کسی کا ذہن تری بات پر نہیں جاتا

زمیں کے اتنے سے ٹکڑے پہ اتنی دیواریں

کہ ایک شخص ادھر سے ادھر نہیں جاتا

وہ چاند تار گریباں میں جا کے اٹکا ہے

تمام آسماں دامن میں بھر نہیں جاتا

ستم کے ہاتھ تھے اور آسماں کو چھوتے تھے

ذرا جھکا دیا ہوتا تو سر نہیں جاتا

وہی لپک ہے سناں میں چمک ہے خنجر میں

اگرچہ میرے قبیلے کا ڈر نہیں جاتا

گماں کے ہاتھ سے مشعل کہاں پہ جا کے گری

اگر میں اپنی حدوں سے گزر نہیں جاتا

کچھ اور تیری طرف سے امید رکھتا ہوں

میں اس طرح کی عنایات پر نہیں جاتا

وہ تم ہی تھے جو بسر کر گئے عتیق اللہ

جہاں سے اتنا کوئی بے خبر نہیں جاتا