wo bad-dua use samjhe agar dua likkhun

vo bad-duā use samjhe agar duā likkhūñ

ab aise shaḳhs ko maiñ apnā haal kyā likkhūñ

kisī kā zauq-e-samā.at qusūr-vār nahīñ

maiñ kyuuñ na harf-e-tamannā ko be-sadā likkhūñ

ab aate lamhoñ ke āsār ye batāte haiñ

jo vaqt biit gayā us ko hādsa likkhūñ

mujhe ta.alluq-e-ḳhātir ho kyā zamāne se

kisī ke naam bhī ḳhat ho tirā patā likkhūñ

isī ḳhayāl se fikr-e-suḳhan meñ ġhaltāñ huuñ

maiñ chāhtā huuñ ki mazmūñ koī nayā likkhūñ

ye ḳhud-satā.ī ke pahlū ye ehtiyāt 'hayāt'

kabhī to saaf koī apnā vāqi.a likkhūñ

wo bad-dua use samjhe agar dua likkhun

ab aise shaKHs ko main apna haal kya likkhun

kisi ka zauq-e-samaat qusur-war nahin

main kyun na harf-e-tamanna ko be-sada likkhun

ab aate lamhon ke aasar ye batate hain

jo waqt bit gaya us ko hadsa likkhun

mujhe talluq-e-KHatir ho kya zamane se

kisi ke nam bhi KHat ho tera pata likkhun

isi KHayal se fikr-e-suKHan mein ghaltan hun

main chahta hun ki mazmun koi naya likkhun

ye KHud-satai ke pahlu ye ehtiyat 'hayat'

kabhi to saf koi apna waqia likkhun