wo bhi ab yaad karen kis ko manane nikle

vo bhī ab yaad kareñ kis ko manāne nikle

ham bhī yūñhī to na maane the siyāne nikle

maiñ ne mahsūs kiyā jab bhī ki ghar se niklā

aur bhī log ka.ī kar ke bahāne nikle

aaj kī baat pe maiñ hañstā rahā hañstā rahā

choT taaza jo lagī dard purāne nikle

ek shatranj-numā zindagī ke ḳhānoñ meñ

aise ham shaah jo pyādoñ ke nishāne nikle

tū ne jis shaḳhs ko maarā thā samajh kar kāfir

us kī muTThī se to tasbīh ke daane nikle

kaash ho aaj kuchh aisā vo mirā mālik-e-dil

mere dil se hī mire dil ko churāne nikle

aap kā dard in āñkhoñ se chhalaktā kaise

mere aañsū to piyāzoñ ke bahāne nikle

maiñ samajhtā thā tujhe ek zamāne kā magar

tere andar to ka.ī aur zamāne nikle

lāpata aaj talak qāfile saare haiñ 'amīr'

jo tire pyaar meñ kho kar tujhe paane nikle

wo bhi ab yaad karen kis ko manane nikle

hum bhi yunhi to na mane the siyane nikle

main ne mahsus kiya jab bhi ki ghar se nikla

aur bhi log kai kar ke bahane nikle

aaj ki baat pe main hansta raha hansta raha

choT taza jo lagi dard purane nikle

ek shatranj-numa zindagi ke KHanon mein

aise hum shah jo pyaadon ke nishane nikle

tu ne jis shaKHs ko mara tha samajh kar kafir

us ki muTThi se to tasbih ke dane nikle

kash ho aaj kuchh aisa wo mera malik-e-dil

mere dil se hi mere dil ko churane nikle

aap ka dard in aankhon se chhalakta kaise

mere aansu to piyazon ke bahane nikle

main samajhta tha tujhe ek zamane ka magar

tere andar to kai aur zamane nikle

lapata aaj talak qafile sare hain 'amir'

jo tere pyar mein kho kar tujhe pane nikle