wo bhi teri thi nazar jis ne mujhe shad kiya

vo bhī terī thī nazar jis ne mujhe shaad kiyā

ye bhī hai terī nazar jis ne ki barbād kiyā

barq kā kaam nasheman ko jalānā hai magar

ik nasheman hai jise barq ne ābād kiyā

ek Thokar ne kabhī baḳhshī hai murde ko hayāt

ek Thokar ne kabhī ziist ko barbād kiyā

is zabāñ ne kabhī dushman ko banāyā apnā

is zabāñ ne kabhī ahbāb ko nāshād kiyā

bevafā.ī ko tirī ham na kabhī bhuul sake

zikr zālim kā chhiḌā jab bhī tujhe yaad kiyā

tū ne bulbul kā qafas lā ke chaman meñ rakkhā

ik nayā zulm ye majbūr pe sayyād kiyā

ham bagūle kī tarah dasht meñ phirte haiñ 'ġhubār'

josh-e-vahshat ne kuchh aisā hameñ āzād kiyā

wo bhi teri thi nazar jis ne mujhe shad kiya

ye bhi hai teri nazar jis ne ki barbaad kiya

barq ka kaam nasheman ko jalana hai magar

ek nasheman hai jise barq ne aabaad kiya

ek Thokar ne kabhi baKHshi hai murde ko hayat

ek Thokar ne kabhi zist ko barbaad kiya

is zaban ne kabhi dushman ko banaya apna

is zaban ne kabhi ahbab ko nashad kiya

bewafai ko teri hum na kabhi bhul sake

zikr zalim ka chhiDa jab bhi tujhe yaad kiya

tu ne bulbul ka qafas la ke chaman mein rakkha

ek naya zulm ye majbur pe sayyaad kiya

hum bagule ki tarah dasht mein phirte hain 'ghubar'

josh-e-wahshat ne kuchh aisa hamein aazad kiya