wo bhul gaya mujhse barson ki shanasai

vo bhuul gayā mujh se barsoñ kī shanāsā.ī

lamhoñ ne ḳhatā kī thī sadiyoñ ne sazā paa.ī

hālāt kā ab maiñ huuñ ḳhāmosh tamāshā.ī

bhaa.ī se taḌaptā hai milne ke liye bhaa.ī

tasvīr tasavvur hī bas ek sahārā hai

furqat ne banā Daalā us kī mujhe saudā.ī

jazbāt the be-qābū kartā bhī to kyā kartā

us rashk-e-gul-e-tar kī jab yaad mujhe aa.ī

yādoñ ke jharokoñ se hasrat hai use dekhūñ

pahle thā jo āñkhoñ kī merī kabhī bīnā.ī

vo dekhnā muḌ muḌ kar us kā mujhe hasrat se

baaqī na rahī merī jab quvvat-e-goyā.ī

jo tār-e-rag-e-jāñ par har-vaqt ġhazal-ḳhvāñ thī

ras gholtī hai ab bhī kānoñ meñ vo shahnā.ī

duzdīda-nigāhī meñ kho jaatā thā dil jin kī

un jhiil sī āñkhoñ kī yaad aa.ī hai gahrā.ī

detā hai koī dastak aa aa ke dar-e-dil par

kaaTe nahīñ kaTtī hai 'barqī' shab-e-tanhā.ī

wo bhul gaya mujh se barson ki shanasai

lamhon ne KHata ki thi sadiyon ne saza pai

haalat ka ab main hun KHamosh tamashai

bhai se taDapta hai milne ke liye bhai

taswir tasawwur hi bas ek sahaara hai

furqat ne bana Dala us ki mujhe saudai

jazbaat the be-qabu karta bhi to kya karta

us rashk-e-gul-e-tar ki jab yaad mujhe aai

yaadon ke jharokon se hasrat hai use dekhun

pahle tha jo aankhon ki meri kabhi binai

wo dekhna muD muD kar us ka mujhe hasrat se

baqi na rahi meri jab quwwat-e-goyai

jo tar-e-rag-e-jaan par har-waqt ghazal-KHwan thi

ras gholti hai ab bhi kanon mein wo shahnai

duzdida-nigahi mein kho jata tha dil jin ki

un jhil si aankhon ki yaad aai hai gahrai

deta hai koi dastak aa aa ke dar-e-dil par

kaTe nahin kaTti hai 'barqi' shab-e-tanhai