wo chand tha baadalon mein gum tha

vo chāñd thā bādaloñ meñ gum thā

vo aks thā pāniyoñ meñ gum thā

dastak kī sadā to aa rahī thī

maiñ apne hī vāhimoñ meñ gum thā

chehre pe mohabbateñ sajī thiiñ

dil apnī hī nafratoñ meñ gum thā

miTTī meñ namī kahāñ se aatī

paanī to samundaroñ meñ gum thā

darbār meñ kursiyāñ sajī thiiñ

har shaḳhs aqīdatoñ meñ gum thā

us ahd kā kyā shumār kiije

jo ahd ka.ī rutoñ meñ gum thā

insāf kī bhiik kise miltī

qānūn shahādatoñ meñ gum thā

shīrīñ se sajā thā qasr-e-ḳhusrav

farhād mohabbatoñ meñ gum thā

manzil kā surāġh dene vaalā

be-nām masāfatoñ meñ gum thā

wo chand tha baadalon mein gum tha

wo aks tha paniyon mein gum tha

dastak ki sada to aa rahi thi

main apne hi wahimon mein gum tha

chehre pe mohabbaten saji thin

dil apni hi nafraton mein gum tha

miTTi mein nami kahan se aati

pani to samundaron mein gum tha

darbar mein kursiyan saji thin

har shaKHs aqidaton mein gum tha

us ahd ka kya shumar kije

jo ahd kai ruton mein gum tha

insaf ki bhik kise milti

qanun shahadaton mein gum tha

shirin se saja tha qasr-e-KHusraw

farhad mohabbaton mein gum tha

manzil ka suragh dene wala

be-nam masafaton mein gum tha