wo chahchahe na wo teri aahang andalib

vo chahchahe na vo tirī āhañg andalīb

kis gul kī yaad meñ hai tū dil-e-tañg andalīb

be-dād-e-bāġhbāñ se jo maiñ sair-e-bāġh kī

lākhoñ dabī paḌī thiiñ tah-e-sañg andalīb

ab barg-e-gul bhī chhīne hai dast-e-nasīm se

aage to is qadar na thī sarhañg andalīb

kyā zulm hai ki tū hai asiir aur baaġh meñ

kaliyāñ nikāltī haiñ na.e rañg andalīb

tujh ko asiir gardish-e-ayyām ne kiyā

chob-e-qafas se kartī hai kyuuñ jañg andalīb

gar shāḳh-e-gul meñ ho kamar-e-yār kī lachak

is se uḌe na khāve agar sañg andalīb

jaatā huuñ gar chaman meñ to rakh rakh ke kaan ko

naale kā mujh se sīkhtī hai Dhañg andalīb

vallāh bhuul jaave tū sab apne chahchahe

gar baaġh meñ ho vo sanam-e-shañg andalīb

aa kar chaman meñ 'mus.hafī'-e-ḳhasta kyā kare

ab sair-e-gul ko samjhe hai ye nañg andalīb

wo chahchahe na wo teri aahang andalib

kis gul ki yaad mein hai tu dil-e-tang andalib

be-dad-e-baghban se jo main sair-e-bagh ki

lakhon dabi paDi thin tah-e-sang andalib

ab barg-e-gul bhi chhine hai dast-e-nasim se

aage to is qadar na thi sarhang andalib

kya zulm hai ki tu hai asir aur bagh mein

kaliyan nikalti hain nae rang andalib

tujh ko asir gardish-e-ayyam ne kiya

chob-e-qafas se karti hai kyun jang andalib

gar shaKH-e-gul mein ho kamar-e-yar ki lachak

is se uDe na khawe agar sang andalib

jata hun gar chaman mein to rakh rakh ke kan ko

nale ka mujh se sikhti hai Dhang andalib

wallah bhul jawe tu sab apne chahchahe

gar bagh mein ho wo sanam-e-shang andalib

aa kar chaman mein 'mushafi'-e-KHasta kya kare

ab sair-e-gul ko samjhe hai ye nang andalib