wo dasht-e-karb-o-bala mein utarne deta nahin

vo dasht-e-karb-o-balā meñ utarne detā nahīñ

havā-e-tez meñ mujh ko bikharne detā nahīñ

zamīñ ko chūmnā chāhūñ ki vo zamīñ pe hai

vo āsmān se mujh ko utarne detā nahīñ

jhapakne detā nahīñ aañkh vo shab-e-ḳhalvat

mire lahū ko vo ārām karne detā nahīñ

ye kis azaab meñ us ne phañsā diyā mujh ko

ki us kā dhyān koī kaam karne detā nahīñ

kiye haiñ band 'atā' us ne saare darvāze

kisī bhī raah se mujh ko guzarne detā nahīñ

wo dasht-e-karb-o-bala mein utarne deta nahin

hawa-e-tez mein mujh ko bikharne deta nahin

zamin ko chumna chahun ki wo zamin pe hai

wo aasman se mujh ko utarne deta nahin

jhapakne deta nahin aankh wo shab-e-KHalwat

mere lahu ko wo aaram karne deta nahin

ye kis azab mein us ne phansa diya mujh ko

ki us ka dhyan koi kaam karne deta nahin

kiye hain band 'ata' us ne sare darwaze

kisi bhi rah se mujh ko guzarne deta nahin